2008.02.01

Ц.Баярсайхан: Аймаг, орон нутгийг түргэн эзэнтэй болгоосой

Шийдвэрт хариу өгөх хуулийн хугацаа хэтэрлээ. Өмнөговь аймгийн Засаг дарга З.Ядмаа үүрэгт ажлаасаа чөлөө хүссэн өргөдөл өгөөд сар гаруйн хугацаа өнгөрч байна. “Эзэнгүй” үлдсэн аймагт ямар ажлууд тулгамдаж байгаа болон Засаг даргын томилгооны талаар тус аймгаас УИХ-д сонгогдсон гишүүдийн нэг болох Ц.Баярсайханаас тодрууллаа.

-Өмнөговь аймаг Засаг даргагүй болоод багагүй хугацаа өнгөрлөө. Шинэ даргын томилгоо хэзээ болох бол?

-Өмнөговийн хуучин Засаг дарга З.Ядмаа ажлаасаа чөлөөлүүлэх хүсэлтээ Ерөнхий сайдад гаргасан юм билээ. Аймгийн ИХХ-ын хуралдаан болж дээрээс өгсөн чиглэлийн дагуу Монросцветметийн ерөнхий захирлаар ажиллаж байсан Х.Бадамсүрэнгийн нэрийг Засаг даргад дэвшүүлсэн. Тэр шийдвэр гарснаас хойш cap гаруйн хугацаа өнгөрлөө. Гэвч одоогоор томилгоо хийгээгүй байна. Шийдвэрт хариу өгөх хуулийн хугацаа хэтэрсэн гэсэн үг л дээ. Х.Бадамсүрэнгийн хувьд шүүх, мөрдөн байцаах газарт асуудалтай байгаа учраас түүнийг нэг мөр болгож цэгцэлж байж ажилдаа орох гэж байгаа байлгүй дээ.

-Шүүхийн байгууллагад асуудалтай хүнийг аймгийн Засаг даргад нэр дэвшүүлсэн талаар та ямар байр суурьтай байгаа вэ?

-Аймаг орны удирдлага тогтворгүй байгаагаас шалтгаалж алдсан боломжууд бий. Цаашид ингэж боломж алдмааргүй байна. Х.Бадамсүрэнгийн хувьд уул уурхайн чиглэлээр туршлага хуримтлуулсан хүн тул ашигт малтмалын орд ихтэй Өмнөговь аймгийг удирдахаар болбол би хувьдаа дэмжиж байна. Харин асуудлыг хурдан шийдэж аймгийг түргэн эзэнтэй болгоосой гэж бодож байгаа.

-Та аймагтайгаа байнга харилцаатай байдаг байх. Засаг даргагүй аймагт өвөлжилтийн байдал ямар байна?

-Өмнөговь аймгийн хэмжээгээр өнөөдөр өвөлжилт харьцангуй гайгүй, харин баруун талын хэдэн суманд цас нэлээд орсон. Цаашдаа хаваржилт хүндрэх байдал харагдаж байгаа.

-Танай аймаг ашигт малтмалаар баялаг. Түүнийг ашигласны үр дүн Өмнөговь аймгийнханд хэр “наалддаг” вэ?

-Улс орны хэмжээний стратегийн орд газруудын талаар УИХ-аар ид ярьж байна. Оюутолгой, Тавантолгой зэргийг стратегийн орд газарт багтаах, Оюутолгойд хөрөнгө оруулалтын гэрээ байгуулах ажлыг Засгийн газрын төвшинд хэлэлцэж байна. Энэ бүхэнд аймаг, орон нутгийн удирдлагын санал оролцох ёстой. Миний хувьд хэлэхэд дээрх ордууд Монголын баялаг ч гэсэн газар нутаг дээр нь аж төрж буй иргэдэд өгөөжөө өгөх ёстой ордууд. Хөрөнгө оруулалтын гэрээ байгуулахаас гадна говь нутаг, Өмнөговийг хөгжүүлэхэд ямар ажил хийх талаар ярих ёстой. Ордыг ашиглахын тулд хөрсний усыг ашиглана. Өмнөговь баялаг устай газар биш.

Гүний усыг ашиглана гэж ярьдаг ч тэр ус хураар тэтгэгдэж, хэдэн худгийн маань эх булаг болдог. Говийн байгаль эмзэг. Байгаль, цаг уурын хүндрэлээс шалтгаалаад малын тоо толгой цөөрч, бэлчээрийн даац муудаж байна. Тэгэхээр говьчуудад ажлын байр хэрэгтэй. Хар бор ажил биш, нарийн мэргэжлийн, өндөр цалин хөлстэй ажил хийх ёстой. Тэр хүмүүсийг бэлтгэх ажил чухал. Хөрөнгө оруулалтын гэрээний зэрэгцээ бүс нутгийг хөгжүүлэх төлөвлөгөө хэрэгтэй. Аймаг, сумын удирдлага, УИХ-ын гишүүд, иргэд бүгд санаа тавьж оролцох ёстой гам. Оюутолгойг аль болохоор түргэн эргэлтэд оруулж, хөгжлийн гол хүчин зүйл болгох ёстой. Энэ том ордыг аймгийн хөгжилтэй холбоход говийн бизнесийн төлөвлөгөөтэй уялдуулах нь зүйтэй байдаг. Уул уурхайд голдуу эрчүүд ажиллана. Тэдний гэр бүлийнхэнд зориулж тэмээний ноосоор бүтээгдэхүүн хийх, барилга, үйлдвэрлэлийн салбар хөгжүүлж шинэ хот байгуулах ирээдүй бий.



0ЭКСПЕРТсэтгэгдэл
Сэтгэгдэл оруулахын тулд та хэрэглэгчийн эрхээр нэвтэрнэ үү.
Экспертүүдийн сэтгэгдэл
Одоогоор сэтгэгдэл нэмэгдээгүй байна.