"Бүтээн байгуулалтын цаг" уулзалт боллоо.
2013.07.02

Удаашралтай яваа ажлуудад анхаарахыг сайд нарт даалгалаа

Ерөнхий сайд Н.Алтанхуяг даваа гараг бүрийн 15.00 цагт хийдэг болсон “Бүтээн байгуулалтын цаг”-аар өнгөрөгч долоо хоногт томоохон төслүүд хэр урагшилсныг сонслоо. Ухаа худаг-Гашуун сухайт чиглэлд тавьж буй 267 км төмөр замын суурийн ажил 4 хувиар урагшилж, 24 хувийн гүйцэтгэлтэйгээр саадгүй үргэлжилж байна гэж Зам тээврийн яамны Төрийн нарийн бичгийн дарга Б.Батзаяа мэдээллээ.

Энэ онд нийслэлтэй хатуу хучилттай авто замаар холбогдох Дорнод, Өмнөговийн чиглэлд хоёр ч хэсэг одоо хүртэл эзэнгүй байгаа, зарим компанийн хариуцсан зам ахицгүй удааширч байгааг Ерөнхий сайд Н.Алтанхуяг Зам тээврийн яамныханд хатуу анхаарууллаа. Мөн Булганы Уньтаас Хөвсгөл хүрэх замын гүйцэтгэгчийг солих, асуудлын оновчтой шийдлийг Засгийн газрын хуралдаанаар яаралтай оруулж хэлэлцүүлэхийг даалгалаа.

Тэрэлж, Төв аймгийн Эрдэнэ сумын замуудын ажил мөн удааширч, олон салаа шороон зам үүсгэн хөрс ургамал гэмтээж байгаа тул гүйцэтгэгч компанийн хариуцлагыг өндөржүүлэх, товлосон хугацаанд нь ашиглалтад оруулахыг ЗГХЭГ-ын дарга Ч.Сайханбилэг тус яамныханд давхар сануулсан юм.

Орон сууцны 8 хувийн хүүтэй зээл олгож эхэлснээс хойшхи 14 хоногийн хугацаанд 8000 иргэн өндөр хүүтэй зээлээс шилжиж, шинээр 400 гаруй иргэн зээл авчээ. “Чингис бонд”-ын хөрөнгөөр орон сууцны 9 хороолол, гэр хорооллын 9 байршилд хийгдэх 73 ажил төлөвлөгөөний дагуу 10-40 хувийн гүйцэтгэлтэй байна гэж Барилга, хот байгуулалтын сайд Ц.Баярсайхан мэдээллээ.

Үйлдвэр, хөдөө аж ахуйн яам хариуцан ажиллаж байгаа Сайншандын боловсруулах үйлдвэр, Баянхонгорын хоёр сумыг жишиг болгон шинэчлэх ажил төлөвлөгөөний дагуу явж байна. Чингис бондоос аж үйлдвэрлэлийн төслүүдэд 7-гоос хэтрэхгүй хувийн хүүтэй зээл олгохоор Төв банктай ярьж тохирсон, ирэх долоо хоногоос зээлээ олгож эхэлнэ гэж Үйлдвэр, хөдөө аж ахуйн сайд Х.Баттулга хэллээ.

Хөдөө аж ахуйн бирж ажиллаж эхлээд гуравхан сар болж байгаа ч 4500 орчим тонн ноолуур худалдаалсан нь жилийн нийт хэрэглээний 75 хувийг бүрдүүлсэн талаар ҮХАА-н сайд Х.Баттулга нэмж дурьдсан юм.

ТЭЦ-3, ТЭЦ-4, ТЭЦ-5 станцуудын ажил графикийн дагуу хэвийн үргэлжилж байна. Харин Амгалангийн ДЦС-ын ажил газар чөлөөлөлтөөс үүдэн саатаад байна гэж Эрчим хүчний сайд М.Сономпил танилцууллаа.

Тус бүсэд газар өмчлөгч 85 өрх байгаагийн 20-оодтой нь л тохиролцоонд хүрсэн, үлдсэнтэй нь гэрээ хэлцэл байгуулахад нэмж хоёр тэрбум шахам төгрөг хэрэгтэй байгааг Нийслэлийн засаг дарга Э.Бат-Үүл тайлбарласан юм. Үүнтэй холбогдуулан газраа чөлөөлөөгүй байж Засгийн газраас шийдвэр гаргуулдаг хариуцлагагүй байдал дахин гаргах ёсгүйг Ерөнхий сайд нийслэлийн удирдлагуудад анхаарууллаа.

Орон сууцны 8 хувийн хүүтэй зээл олгож эхэлснээс хойшхи 14 хоногийн хугацаанд 8000 иргэн өндөр хүүтэй зээлээс шилжиж, шинээр 400 гаруй иргэн зээл авчээ.

“Гудамж” төслийн хүрээнд энэ долоо хоногт Дарь-Эхийн болон АПУ компанийн уулзваруудыг шинэчилж дуусган ашиглалтад оруулна. Туул, Сэлбэ голуудыг дагуулан тавих хурдны замын ажлуудыг эхлүүлэхэд бэлэн ч ногоон байгууламж, мод зүлэг шилжүүлэн суулгах ажлаас үүдэн хүлээгдэл үүсээд байгаа талаар Эдийн засгийн хөгжлийн сайд Н.Батбаяр танилцууллаа.

Тус яамнаас 2014-2018 онд улсын төсвийн хөрөнгө оруулалтаар хийх ажлуудын жагсаалт, хөгжлийн төлөвлөлттэй холбоотой олон хууль боловсруулж, УИХ-ын намрын чуулганаар хэлэлцүүлэхээр төлөвлөж байгаа аж. Нээлттэй мэдээллийн төгсгөлд энэ сард дуусган хүлээж авах зарим бүтээн байгуулалтын ажлын товыг тогтоолоо.

22-ын товчооны замын шинэчлэл, Хүй долоон худгийн өргөтгөлийг энэ долоо хоногийн сүүлчээр, Баянхонгор хүртэлх хатуу хучилттай зам, Замын-Үүд хилийн боомтын нэвтрүүлэх чадварыг хоёр дахин нэмэгдүүлсэн шинэчлэлийн ажлыг наадмын дараа хүлээн авахаар боллоо.