МАН-ын бүлгийн хурлаар ямар асуудал хэлэлцсэн талаар Ө.Энхтүвшин сэтгүүлчдэд мэдээлэл хийлээ.

-Засгийн газарт зарим эрх олгох тухай хуулийн төслийг УИХ дахь Ардчилсан намын бүлэг буцаах шийдвэр гаргажээ. Танай бүлэг энэ асуудлыг хэрхэхээр болсон бэ?

-Засгийн газарт зарим эрх олгох тухай хуулийн төсөл нь Төсвийн хууль, Үндсэн хуулийг зөрчихгүй ээ. Өмнө нь ийм практик байсан уу гэдгийг ч судалсан. 2006 онд л гэхэд намайг Боловсрол, соёл, шинжлэх ухааны сайд байх үед УИХ-аас тогтоол гаргаад “Үдийн цай хөтөлбөрийг хэрэгжүүл” гэдэг үүрэг өгсөн юм. Санхүүжилтийг нь яах вэ гэхэл 2006 оны 10, 11, 12 дугаар сарын санхүүжилтийг нь урагш нь гүйлгээд зохицуулаад болж л байсан. Хоёрдугаар сарын 1-нээс цалин, тэтгэврийг нэмнэ гээд олон нийтэд хүлээлт үүсгэчихсэн учраас шийдэх ёстой. УИХ дах Ардчилсан намын бүлэг саад тотгор болоод байхгүй байлгүй дээ.

-Орон нутгийн сонгуулийг УИХ-ын сонгуультай зэрэг явуулахаар 2008 онд хуульчилсан. Үүнийг АН-ын бүлэг ч дэмжиж байгаа. Харин танай бүлэг тусад нь явуулна, нэмэлт өөрчлөлт оруулна гээд байгаагийн учир юу вэ?

-Хоёр сонгуулийг хамтад нь салгахгүй цуг хийнэ гэвэл бэрхшээлтэй асуудал их байна. Тухайн үед орон даяар сонгууль явна. Жишээ нь УИХ-ын сонгууль аймгийн сонгууль, сумын сонгууль, багийн сонгууль, дүүрэг дээр хот дээр гээд зэрэг зэрэг сонгууль болохоор сонгуулийнх нь дүнг баталгаажуулна гэдэг нэлээд төвөгтэй болчих вий гэж болгоомжилж байна. 20-иод мянган хүн орох болж байгаа. Энийг нэгэн өдөр явуулахад техникийн талаасаа ч, хүн хүч талаасаа ч, хууль эрх зүйн талаасаа ч, улстөр талаасаа ч хүнд юм аа гэж үзээд Д.Лүндээжанцан нарын өргөн мэдүүлсэн тусад нь явуулах хуулийн төслийг дэмжсэн байгаа.