Ө.Энхтүвшин: Баривчлах шийдвэр гаргасан нь шүүх, прокурор, АТГ юм байна

2012.04.16

Ө.Энхтүвшин: Баривчлах шийдвэр гаргасан нь шүүх, прокурор, АТГ юм байна

Монгол Улсын Ерөнхийлөгч асан, МАХН-ын дарга Н.Энхбаярыг баривчилсантай холбогдуулан УИХ дахь МАН-ын бүлэг өчигдөр ээлжит бусаар хуралдсан юм. МАХН-ын бүлгийн дарга Ө.Энхтүвшинг бүлгийн хуралд орохынх нь өмнө сэтгүүлчид байр суурийг нь сонирхсон юм. Тэрээр пүрэв гаригаас баасан гаригт шилжих шөнө болсон үйл явдлын талаар "Үнэхээр зохимжгүй харагдаж байна. Шүүхийн шийдвэр гараад дуудахад ирэхгүй байсан тохиолдолд, шаардлагатай бол зохих журмын дагуу албадан баривчлах хуулийн заалт бий. Гэхдээ урьд шөнийн хувьд юун олон цагдаа вэ, яагаад шөнөөр баривчлах гэж оролдов, яахаараа долдугаар сарын 1-тэй холбоотой асуудлаар хэвлэлийн бага хурал хийсэн тэр шөнө нь хорьдог юм. Энэ нь эргэлзээ төрүүлж байна" хэмээсэн юм. МАН-ын бүлэг хоёр цаг гаруй хуралдсаны эцэст бүлгийн дарга Ө.Энхтүвшин, МАН-ын нарийн бичгийн дарга Ц.Сүхбаатар, МАН-ын Удирдах зөвлөлийн гишүүн Д.Сарангэрэл нар хэвлэлийнхэнд мэдээлэл хийв. Энэ үеэр УИХ дахь МАН-ын бүлэг Мон-гол Улсын Ерөнхийлөгч асан Н.Энхбаярыг баривчилсантай холбогдуулан байр сууриа албан ёсоор илэрхийлж, уриалга гаргаж байгаагаа мэдэгдсэн юм. Энэ үеэр МАН-ын бүлгийн дарга Ө.Энхтүвшин сэтгүүлчдийн асуултад хэрхэн хариулсныг хүргэж байна.

-МАН-ын бүлгийн гурван гишүүн Ерөнхийлөгч асан Н.Энхбаярыг баривчлах үед цуг байсан. Тэд болсон үйл явдлын талаар ямар тайлбар хийж байна вэ?

-Бид бүлгийнхээ гишүүдтэй уулзаж тайлбар авч байна.

-Эдгээр гишүүд намаасаагарч МАХН-д элсэнэ гэж мэдэгдсэн юм уу?

-Намаас гарна гэсэн юм байхгүй. Хоёр гурав хоногийн өмнө би хэвлэлд өгсөн ярилцлагадаа ч энэ талаар тодорхой хэлсэн. Гэхдээ тийм байдлаар албан ёсоор намаас гарна гэж ярьсан зүйл байхгүй.

-Танай бүлгийн гурван гишүүн болсон явдлын талаар ямар тайлбар хийж байна вэ?

-Бидэнд хамгийн ойрхон эх сурвалж гэвэл бүлгийн гишүүд маань байна. Тэднийг урд шөнө тэнд байсны хувьд яг юу болсон юм гэдгийг тодруулсан. Бүлгийн гишүүд тэнд болсон үйл явдлын талаар мэдээлэлтэй болох хэрэгтэй байна.

-ХЗДХ-ийн сайдын хувьд Ц.Нямдорж сайд энэ талаар ямар мэдээлэл өгсөн бэ?

-Ц.Нямдорж сайдаас бүлгийн гишүүд асуусан. Ц.Нямдорж сайд бүлгийн гишүүдэд хариуцлагатайгаар мэдэгдсэн. Ийм зүйл болсныг өглөө мэдсэн гэсэн. Ц.Нямдорж сайд та бүхэнтэй уулзах биз.