Монголын геологийн төв лаборатори олон улсад гурвалсан стандартаар итгэмжлэгджээ
Геологийн төв лабораторийн захирал Н.Тэгшбаяр
2016.01.29

Монголын геологийн төв лаборатори олон улсад гурвалсан стандартаар итгэмжлэгджээ

Монгол Улс эрдэс баялаг, ашигт малтмалын нөөцөөр арвин, уул уурхайн салбар нь дэлхий нийтийн анхаарлын төвд байдаг. Ашигт малтмалын нөөцөөс гадна эрдсийн шинжилгээний чанар чухал байр суурийг эзэлдэг юм. Шинжилгээний чанарыг улс орон бүрт геологийн итгэмжлэгдсэн лаборатори тодорхойлдог бөгөөд түүнийг нь дэлхийд зөвшөөрөх нь цөөн байдаг аж. Монголын геологийн төв лаборатори “гурвалсан итгэмжлэлээр зэрэг итгэмжлэгдсэн” дэлхийн таван лабораторийн нэг боллоо.

Геологийн төв лабораторийн захирал Н.Тэгшбаяр “Дэлхийд гурвалсан итгэмжлэлээр зэрэг итгэмжпэх гэдэг маань геологийн лабораторийн гурван шалгуурыг тэр хэмжээнд давсан гэсэн үг.

Тодруулбал, нэгдүгээрт, лабораторид тавигдах ерөнхий итгэмжлэл, хоёрдугаарт, аттестатчилсан, стандартчилсан загвар зохион бүтээгчийн, гуравдугаарт, ур чадварын сорилт зохион байгуулагчийн олон улсын түвшинд итгэмжлэгдлээ. Үүний тулд лабораторид ажилладаг химич, физикч, геологийн инженер зэрэг хүний нөөцөө олон улсын түвшинд хэр бэлтгэсэн, хэрэглэгдэж буй тоног төхөөрөмж нь сүүлийн үеийнх мөн эсэхийг голчлон анхаардаг. Мөн ажилчдын туршлага, тэдний хэрэглэж буй программ хангамжийг хүртэл олон улсад хүлээн зөвшөөрөгдөж байна уу гэдгийг давхар шалгадаг. Ингэж цогцоор нь үнэлж шалгасны үндсэн дээр итгэмжлэгдэх эсэхийг тогтоодог. Монголын Геологийн төв лаборатори энэ бүх шалгуурыг давж, дэлхийн шилдэг таван лабораторийн нэг боллоо.

Дэлхий дахинаа АНУ-ын Үндэсний итгэмжлэлийн байгууллагаар итгэмжлэгдсэн 800 гаруй лаборатори, байгууллага байдаг. Тэдгээр тавын нэг болно гэдэг бол чамгүй амжилт. Манай байгууллага дэлхийд данстай боллоо гэсэн үг. Энэ бол Монголын бахархал юм. Геологийн төв лаборатори үүсгэн байгуулагдсанаасаа хойш 58 дахь жилдээ тасралтгүй үйл ажиллагаагаа явуулсаар өдийгхүрсэн. Олон улсын түвшинд гурвалсан итгэмжлэлийг хангаж чадсан нь дан ганц одоо ажиллаж байгаа ажилсаг, бүтээлч, залуусын гавьяа байхаас гадна манай лабораторийг үүсгэн байгуулалцаж, үйл ажиллагааг нь эхлүүлсэн шинжлэх ухаанч ахмад буурлуудын ач гэдгийг давхар санах хэрэгтэй. Өчигдөргүйгээр өнөөдөр үгүй гэдэг шүү дээ” гэсэн юм.

Мөн тэрбээр “Манай лаборатори улс орныхоо эдийн засаг, хөгжил цэцэглэлтэд чухал хувь нэмэр оруулдаг. Наад зах нь хилээр гарч буй эрдсийн түүхий эдийн дотор хэр хэмжээний алт байгааг нарийвчлан тогтоодог. Оюу толгойн уурхайгаас гарч" байгаа бүх дээжид “Арбитр экспертизийн шинжилгээ”-г хийж байна. Бид 2016 оныг “Итгэмжлэлээс итгэмжпэл рүү явах жил” болгон зарласан. Энэ нь амжилтаа ахиулна гэсэн үг. Ингэснээр уул уурхайн салбарт тэр дундаа хайгуулын салбарт хөрөнгө оруулагчдын хайгуулын ажлын өгөөжийг нэмэгдүүлэхэд бидний оролцоо өндөр түвшинд хүрч байгаа юм.

Дашрамд дуулгахад, Геологийн төв лаборатори нь эрдсийн түүхий эдийн тоон болон хагас тоон шинжилгээ, нүүрсний шинжилгээ, стандартчилсан загвар, аттестатчилсан стандартчилсан загварын үйлдвэрлэл, борлуулалт, байгаль орчны судалгаа шинжилгээ, бодисын найрлагын судалгаа, ашигт малтмалын баяжигдах шинж чанарын лабораторийн туршилт зэрэг олон талт судалгаа шинжилгээг хийдэг аж. Энэ бүхний эцэст эх орныхоо ашигт малтмалын дээжийг гадны улсад шинжлүүлдгийг эцэслэх түвшинд хүрлээ гэж Н.Тэгшбаяр онцлон тэмдэглэв.