15 Шүүх нэмж байгуулах ч шүүгчдийн тоог нэмэхгүй
УИХ-ын чуулган
2016.05.16

15 Шүүх нэмж байгуулах ч шүүгчдийн тоог нэмэхгүй

УИХ-ын чуулганы баасан гаригийн хуралдаанаар Шүүх байгуулах тухай хуульд нэмэлт, өөрчлөлт оруулах тухай, Эрүүгийн хэрэг хянан шийдвэрлэх тухай хуулийн шинэчилсэн найруулга, Эрүүгийн хуулийг дагаж мөрдөх журмын тухай хууль, Хууль сахиулах ажиллагааны тухай болон холбогдох бусад хуулийг батлав.

АН Сонгуулийн тойрог, мандатыг тогтоох тухай УИХ- ын тогтоолын төслийг өмнөх өдөр нь хүч түрэн баталсан тул өнгөрсөн баасан гаригийн үдээс өмнөх чуулган хуралдаж чадсангүй. Учир нь МАН-ын бүлгийн гишүүд хуралдаанд оролцоогүйгээс ирц бүрдээгүй юм.

Уг нь МАН-ын бүлгийн дарга С.Бямбацогт бүлгийн гишүүдийн хамт танхимд байсан ч бүлгийн дарга С.Бямбацогт “Та нар хүч түрээд явдаг, сонгууль үймүүлэх гэж байна. Ингэж болохгүй” гэсэн тайлбарыг хурал даргалагчид хэлээд картаа уншуулахыг хүссэнгүй.

Харин үдээс хойшх хуралдааны эхэнд Засгийн газраас малчдын талаар авсан арга хэмжээ болон малчны зээлийн хүүг бууруулж байгаа ажлын талаар Ерөнхий сайдын мэдээллийг сонслоо. Малчдад зориулсан үйл ажиллагаанууд учир дутагдалтай байгааг МАН-ын бүлгийн гишүүд шүүмжилж, түүхий эд болоод зээлийн хүүтэй холбоотой зарим асуудлыг Засгийн газрын тэргүүнээс тодруулав.

Ё.Отгонбаяр:

-Хөдөө орон нутагт мал мах, арьс ширний үнэ буурсан нь малчдын амьжиргааг хүндрүүлж байна. Махны экспорт юу болсон. Тэрбум ам.долларын экспортоос хэд нь гарсан байна вэ?

Ч.Сайханбилэг:

-Бид жилээс жилд малын гаралтай түүхий эдийн үнийг анхаардаг. Өнөөдөр ноолуурын үнэ кг нь 71 мянга орчим байгаа. Арьс ширийг экспортлох тал дээр нэг удаагийн арга хэмжээ зохион байгуулсан. Махыг ОХУ, БНХАУ руу экепортлох зөвшөөрөлтэй компани бага байсан. Харин одоо тусгай хэлэлцээр байгуулан анхаарч ажиллаж байгаа. 12 компани мах экспортлох эрхээ авсан.

Б.Бат-Эрдэнэ:

-Монгол Улс бүхэлдээ зээлийн барьцаанд байна. Зээлийн тойргоос гаргая гэж байхад асуудал шийдэхгүй байлгаж байгаад малчны зээлийг бууруулах шийдвэр гаргасан. Цогцоор нь яаж шийдэх вэ гэдгийг хөндөх хэрэгтэй.

Нүглийн нүдийг гурилаар хуурч байна.

Та Дубайд очоод Оюутолгойг дэлхийн 14 банкны барьцаанд тавьсан. Тэгээд нэг сая хонь гаргахаар боллоо гэсэн. Гэтэл та нэг ширхэг ч хонь гаргаагүй. Ийм байдлаар молиго үмхүүлдгээ болих хэрэгтэй.

Ч.Сайханбилэг:

-Малчны зээл нэг өдөр бий болоогүй. Энэ зээлд 240 тэрбум төгрөг гарсан байгаа. Жилийн 30 хувийн хүүтэй байсан. Үүнийг жилийн 10 хувьд хүргэсэн. Тиймээс асуудлыг шийдэж сарын 0.1 болж, халааснаас нь 13.5 тэрбум төгрөгийг хэмнэсэн.

Засгийн газрын зүгээс цогцоор нь шийдэж байна. Мөн “Сайн оюутан”, “Сайн хашаа” хөтөлбөр хэрэгжүүлж байгаа. Өнгөрсөн өвөл, хавар маш хүнд байсан. Тиймээс өвөлжилт хаваржилтад анхаарч, Онцгой комисс маш сайн ажилласан.

Тавдугаар сарын 6-наас Оюутолгойн гүний уурхайн бүтээн байгуулалтын ажил эхэлсэн. Хөрөнгө оруулалт, ажлын байр нэмэгдэнэ гэсэн хариултыг өгөв.

Мөн энэ өдөр хууль зүйн салбартай холбоотой Шүүх байгуулах тухай хуульд нэмэлт, өөрчлөлт оруулах тухай, Эрүүгийн хэрэг хянан шийдвэрлэх тухай хуулийн шинэчилсэн найруулга, Эрүүгийн хуулийг дагаж мөрдөх журмын тухай хууль, Хууль сахиулах ажиллагааны тухай болон холбогдох бусад хуулийн төслүүдийг хэлэлцэн батлав. Шүүх байгуулах тухай хуульд нэмэлт, өөрчлөлт оруулах тухай хуулийг баталснаар одоо үйл ажиллагаа явуулж байгаа давж заалдах шатны 19 нийтдээ 15 шүүх нэмж шинээр байгуулагдах юм. Мөн шүүгчдийн тоог нэмэгдүүлэхгүйгээр шинээр байгуулах шүүхийн орон тоог шийдвэрлэсэн байна.

Тодруулбал, аймаг, нийслэлийн эрүү, иргэний хэргийн давж заалдах шатны 25 шүүхэд 25 ерөнхий шүүгч, 118 шүүгч, захиргааны хэргийн давж заалдах шатны шүүхэд нэг ерөнхий шүүгч, 15 шүүгч, дүүртийн иррэний хэргийн анхан шатны найман шүүхэд найман ерөнхий шүүгч, 88 шүүгч, дүүргийн эрүүгийн хэргийн анхан шатны найман шүүхэд найман ерөнхий шүүгч, 74 шүүгч, захиргааны хэргийн анхан шатны 22 шүүхэд 22 ерөнхий шүүгч, 82 шүүгч, сум дундын иргэний хэргийн анхан шатны 21 шүүхэд 21 ерөнхий шүүгч, 99 шүүгч, сум дундЫн эрүүгийн хэргийн анхан шатны 21 шүүхэд 21 ерөнхий шүүгч, 72 шүүгч, сум дундын найман шүүхэд найман ерөнхий шүүгч 31 шүүгч байх юм. Өөрөөр хэлбэл, улсын хэмжээнд нийт 693 шүүгч ажиллахаар болж байгаа.

Энэ хуулийг батлагдсан өдрөөс дагаж мөрдөх тул энэ долоо хоногоос эхлэн шүүх нэмж байгуулах ажил эхлэх юм.