С.Бямбацогт: Татвар төлөгчдөд хууль бусаар дарамт үзүүлдэг байдлыг судалж, шийдвэрлэнэ
Хууль зүй, дотоод хэргийн сайд С.Бямбацогт Монголын бизнесийн зөвлөлийн төлөөллүүд
2016.09.28

С.Бямбацогт: Татвар төлөгчдөд хууль бусаар дарамт үзүүлдэг байдлыг судалж, шийдвэрлэнэ

Хууль зүй, дотоод хэргийн сайд С.Бямбацогт Монголын бизнесийн зөвлөлийн төлөөллийг өнөөдөр хүлээн авч уулзлаа.

Ерөнхий сайд Ж.Эрдэнэбатын захирамжаар хөрөнгө оруулагч, бизнес эрхлэгчдэд төрийн захиргааны болон хуулийн байгууллагаас дарамт шахалт үзүүлсэн, үндэслэлгүйгээр мөрдөн шалгасан асуудал байгаа эсэхийг судлах ажлын хэсэг байгуулсан. Энэ хүрээнд С.Бямбацогт сайд Монголын Бизнесийн зөвлөлийнхний саналыг сонссон юм.

Уулзалтад оролцсон тус зөвлөлийн ТУЗ-ын дарга Б.Бямбасайхан гадаад, дотоодын хөрөнгө оруулагчидтайгаа уулзаж, нөхцөл байдлыг бодитоор харж байгаад баяртай байгаагаа хэлсэн юм. Тэрбээр Хууль эрхзүйн тогтворгүй байдал хөрөнгө оруулагчдад сөргөөр нөлөөлж байгааг хэлсэн.

Сүүлийн үед гадаад, дотоодын баялаг бүтээгчдийг дэмжих чиглэлээр хийж байгаа ажлуудыг хөрөнгө оруулагчдад дуулгахад Монголын Бизнесийн зөвлөл тодорхой үүрэг рольтой оролцоно гэдгээ хэлж байв. Уулзалтад оролцогчид Монголын Бизнесийн зөвлөлийн нэгдсэн санал дүгнэлтийг гаргаж, Хууль зүй дотоод хэргийн сайд С.Бямбацогтоор ахлуулсан ажлын хэсэгт албан бичгээр уламжлахаар боллоо.

Харин С.Бямбацогт сайд хэлэхдээ “Төрийн байгууллагаас татвар төлөгчдөд хууль бус, үндэслэлгүйгээр дарамт шахалт үзүүлдэг байдлыг судалж, шийдвэрлэнэ. Цаашдаа бизнесийн эрх зүйн орчныг сайжруулахад ямар ажил хийх вэ гэдэгт санал бодлоо солилцох зорилгоор тогтмол уялдаа холбоотой ажиллана” гэв.