Оюунхорол.Д 2017.06.07 | Яамны хэвлэл мэдээллийн алба

Дарь-Эхийн 180 гаруй айлыг цахилгааны шугаманд холбуулна

Дарь-Эхийн 180 гаруй айлыг цахилгааны шугаманд холбуулна

Улаанбаатар хот өдрөөс өдөрт өргөжин тэлсээр байна. Үүнийг дагаад дэд бүтэц, тэр дундаа тог цахилгааны асуудал хотын төвөөс алслагдмал гэр хорооллын айл өрхүүдийн хамгийн тулгамдсан асуудлын нэг болоод буй. 

УИХ-ын гишүүн, БОАЖ-ын сайд Д.Оюунхорол БЗД-ийн Дарь-Эх, Сансарын зургаан хороог төлөөлөн УИХ-ын гишүүнээр сонгогдсон. Харин тойргийнхоо иргэд сонгогчидтой уулзах үеэр гэрэл цахилгаангүй, үр хүүхдүүд нь хичээл номоо хийх боломжгүй, ахуйн хөргөгч, зурагтаа ч ашиглаж чадахгүй нөхцөлд амьдарч байгаа тухайгаа уламжилж байсан юм.

Тэрбээр сонгогдсон даруйдаа энэ асуудалд шуурхайлан хандаж өнгөрсөн намар БЗД-ийн 21-р хорооны Ганц худгийн хойд талын  100 гаран өрхийг төвийн эрчим хүчинд холбуулсан юм. Энэ хавартаа амжиж үлдсэн айл өрхийг эрчим хүчинд холбуулах саналыг ЭХЯ-нд хүргүүлснээр холбогдох зардлыг 2017 оны улсын төсөвт суулгуулж амжсан байна. Ингэснээр БЗД-ийн 21-р хорооны газар нутаг дахь Ганцын задгай, Жамсран уулын өврийн 140 гаруй өрхийг төвийн эрчим хүчинд холбуулах ажлыг эхлүүллээ. 

Тэгвэл уг ажлын хүрээнд өнөөдөр УИХ-ын гишүүний ажлын албаныхан Эрчим хүчний яам болон Зүүн түгээхийн холбогдох албаны хүмүүстэй газар дээр нь ажиллаж, ажлын явцтай танилцлаа. Энэ үеэр хашаа хатгаж буухдаа гудамж гаргаагүй, хашаагаа нийлүүлэн барьсан нь эрчим хүч татахад хүндрэл учруулдаг гэдгийг мэргэжлийнхэн онцоллоо. Учир нь цахилгаан, өндөр хүчдэлийн станц айлын хашаанд хатгаж болдоггүй аж.

Мөн 2016 оны УИХ-ын сонгуулийн сурталчилгааны үер нэр дэвшигч Эрчим хүчний сайд асан Д.Зоригт БЗД-ийн 27 дугаар хорооны гурван байршилд цахилгаан дамжуулах 0.4кВт-ын агаарын шугам татсан ч ямар ч холболт хийгээгүй орхигдуулсан. Энэ байршлуудад холболт хийх хөрөнгийн эх үүсвэрийг шийдвэрлэвэл 40 гаруй өрх цахилгааны асуудлаа шийдвэрлэх боломж бүрдэх юм байна.  Иймд нийт 7 шит тавих хөрөнгийн эх үүсвэрийг шийдвэрлэх чиглэлд УИХ-ын гишүүн Д.Оюунхорол ажиллана гэдгийг түүний ажлын албаныхан тэнд амьдардаг иргэдэд уламжиллаа.