Төр захиргааны бүтцийг улс төрөөс ангид байлгах нь чухал
2011.04.27

Төр захиргааны бүтцийг улс төрөөс ангид байлгах нь чухал

УИХ-ын Төрийн байгуулалтын байнгын хороо, НҮБ-ын Хөгжлийн хөтөлбөрийн газар хамтран "Захиргааны шинэтгэл, асуудал ба шийдэл" сэдвээр өчигдөр бага хурал зохион байгууллаа. Манай улсад сүүлийн 20 жилийн хугацаанд төрийн захиргаа болон төрийн албаны шинэтгэлийн талаар олсон амжилт, туршлага, сургамжийг нэгтгэн дүгнэж, энэ чиглэлээр цаашид шинэтгэл хийх хэрэгцээ, шаардлагын талаар төр, захиргааны байгууллагын ажилтнууд, эрдэмтэн судлаачдын санал бодлыг сонсох үүднээс бага хурлыг зохион байгуулжээ.


Монгол Улс өнгөрсөн 20 жилийн хугацаанд улстөр, эдийн засгийн шинэтгэлийг хийж ирсэн ч захиргааны шинэтгэлээ үндсэнд нь мартжээ. Үүнээс болж, иргэд төрийн үйлчилгээг хүртэж чаддаггүй. Иргэдэд үзүүлэх төрийн үйлчилгээг сайжруулах нэрээр төрийн албыг данхайлгасаар байгаа ч, үр шимийг нь иргэд хүртэж чаддаггүй нь засаг захиргааны шинэтгэлийг хийгээгүйтэй холбоотой гэж хуралд оролцогчид онцолж байлаа. Бага хурлын үеэр УИХ-ын Төрийн байгуулалтын байнгын хорооны дарга Ж.Сүхбаатар "Захиргааны шинэтгэлийн тойм, сургамж, цаашдын чиг хандлага", Сангийн яамны Төсвийн бодлогын газрын Зарлагын хэлтсийн дарга Б.Нямаа "Төсвийн шинэтгэл, хэрэгжилтэд анхаарах зүйлс", УИХ-ын гишүүн Су.Батболд"Нутгийн удирдлагын бие даасан байдлыг бэхжүүлэх нь" НҮБХХ-ийн Засаглалын хөтөлбөрийн ажилтан Л.Бархас "Төрийн захиргааны шинэтгэлийн олон улсын туршлага, сургамж" сэдвээр илтгэл хэлэлцүүллээ.

Хэлэлцүүлэгтэй холбогдуулан УИХ-ын гишүүн Ө.Энхтүвшин, Э.Бат-Үүл, УИХ-ын даргын зөвлөх Д.Даваасамбуу, Засгийн газрын ахлах референт Э.Сумъяа, М.Сандаг-Очир нарын хүмүүс саналаа хэлсэн юм. Тухайлбал, УИХ-ын гишүүн Э.Бат-Үүл, улс төр, улс төрчдөөс төр захиргааны албыг ангид байлгаагүй цагт энэ салбарт хэзээ ч шинэчлэлт үр дүн гарахгүй. Гэтэл улс төр, улс төрчид төр захиргааны албыг мэдэлдээ авч, байгалийн баялгийг хяналтдаа авах хүсэл сонирхлоо төрийн захиргаагаар дамжуулж байна.

Тиймээс бидэнд хамгийн тулгамдаж байгаа асуудал бол улс төр, захиргааны бүтцийг заагласан хатуу хэрэм босгох хэрэгтэй гэв. УИХ-ын даргын зөвлөх Д.Даваасамбуу, улс төрийн томилгоо хийдэг албан тушаалыг багасгах хэрэгтэй. Ингэхгүй бол Монгол Улс нь улс төржсөн орон болж хувираад байна. Иймд зохих хуулиудад эрх зүйн зохицуулалт хийх хэрэгтэй.

Манай улс эдийн засгийн гэмт хэрэгтэй тэмцэж чадахаа байсан. Ингэснээр ард түмний татварын мөнгийг завшигчид хууль завшиж байна. Иймд энэ асуудлыг үнэний талд шийдэхийн тулд улсын Ерөнхий байцаагч томилж, асуудлыг шийддэг болгомоор байна гэж ярилаа. Дэлхийн бусад орнуудын туршлагыг харвал засаг захиргааны шинэтгэлийг урт удаан хугацаанд хийдэг байна. Зарим орон засаг захиргааны шинэтгэлийг 40 жилийн турш хийсэн жишээ ч бий аж.

Монгол Улсын хувьд энэ ажил үндсэндээ мартагдсан ч гэлээ одоо  бодлогыг  нь  гаргачихвал УИХ-ын 2012 оны сонгуулийн дараа хэрэгжүүлээд явах боломжтой гэж УИХ-ын Төрийн байгуулалтын байнгын хорооны дарга Ж.Сүхбаатар хэллээ. Энэ удаагийн бага хурлын төгсгөлд, зөвлөмж гаргаж, түүнийгээ Засгийн газарт уламжлах ажээ.

0ЭКСПЕРТсэтгэгдэл
Сэтгэгдэл оруулахын тулд та хэрэглэгчийн эрхээр нэвтэрнэ үү.
Экспертүүдийн сэтгэгдэл
Одоогоор сэтгэгдэл нэмэгдээгүй байна.