УИХ-ын өчигдрийн чуулганаар төрөөс төмөр замын талаар баримтлах үзэл баримтлалын эхний хэлэлцүүлгийг хийлээ. Засгийн газрын өргөн мэдүүлсэн төслийг Эдийн засгийн байнгын хорооноос Р.Раш гишүүнээр ахлуулсан ажлын хэсэг ажиллаж улам боловсронгуй болгожээ. Гэхдээ Засгийн газрын өргөн мэдүүлсэн төслийг үзэл баримтлалын хувьд өөрчлөөгүй. Өөр дотор нь сайжруулсан гэнэ. Төмөр замд он удаан жил ажилласан, мэргэжлийн хүн хэмээн түүгээр ажлын хэсгийг ахлуулсан аж. Манай улс Таван толгойгоос Зүүнбаян, Сайншандаас Чойбалсан хүртэл төмөр замтай болох юм байна. Хэлэлцүүлгийн үеэр УИХ-ын гишүүн Л.Гундалай Эрдэнэтээс Мөрөн хүртэл 400 км төмөр зам тавих санал гаргав. Гэвч уг санал байнгын хороон дээр гараагүй тул чуулган дээр нэмж орох боломжгүй боллоо. Чиглэл, цариг зэрэг нь төмөр замын талаар төрөөс баримтлах бодлогын талаар хэлэлцэх асуудлын амин сүнс нь байлаа. Гишүүдийн зарим нь өргөн царигтай төмөр зам барих гэж байгаа нь ухралт хэмээн хэлж байлаа. Тухайлбал Д.Тэрбишдагва гишүүн "Өргөн царигтай төмөр зам барина гэдэг нь 20 жилээр ухарч байгаа үзэгдэл" гэсэн бол Н.Ганбямба гишүүн “Герман АНУ-ын технологийг ашиглах гэж байхад, манайх өргөн төмөр зам барих гэж байгаа нь буруу. Энэ чинь Монголын техник технологийг өөрчилж болохгүй гэсэн мессежийг гадагш нь өгөөд байна" хэмээн хэлж байлаа. Байнгын хороон дээр гарсан зарчмын зөрүүтэй саналыг чуулганд санал хураалгаж шийдвэрлэлээ. Төмөр зам барих явдлыг цаг хугацааны хувьд гурван үе шагтай хэрэгжүүлэхээр төсөлд тусгажээ. Эхний ээлжинд уул уурхайн бүсэд төмөр зам барих аж. Ирээдүйд Хархорин Улаанбаатарыг төмер замаар холбох талаар төсөлд тусгажээ. Төмөр зам барина гэдэг цаг хугацаа хөрөнгө шаардсан нүсэр ажил байдаг гэж гишүүн Р.Раш хэлж байлаа. Төслийг дараагийн хэлэлцүүлэгт бэлтгүүлэхээр Эдийн засгийн байнгын хороонд шилжүүллээ. Эцсийн хэлэлцүүлэг хийгдэж уг төсөл батлагдсанаар Монгол Улс төрөөс, төмөр замын талаар баримтлах үзэл баримтлалтай болох юм байна. Дараа нь “Төсвийн тогтвортой байдлын" тухай хуулийн хоёр дахь хэлэлцүүлгийг хийлээ. Уг хуулийн төслийг дагаж Нэгдсэн төсвийн Төсвийн   байгууллага удирдлага санхүүжилтийн, Засгийн газрын тусгай  сангуудын болон Ерөнхийлөгчийн, УИХ-ын, орон нутгийн сонгуулийн хуулиудад өөрчлөлт орох юм байна.