Улаанбаатар хотын дулааны төв шугамд 2018 оны зун хийгдэх засварын ажил болон улсын төсвийн хөрөнгө оруулалтаар хийх ажлууд нь батлагдсан графикийн дагуу 2018 оны 5-р сарын 15-аас 8 сарын 18-ныг хүртэл хийгдэхээр болсон. Нийтдээ хязгаарлалтад 17 газар хамрагдахаар байна. Энэ удаагийн засвар шинэчлэлтийн ажлыг иргэдийг аялал зугаалгаар хөдөө орон нутаг, гадны орон руу зорьдог саруудад түлхүү зохион байгуулахаар болсон байна.

Нийслэлийн засаг даргын орлогч П.Баярхүү: Улаанбаатар хотын нийт цэвэр болон дулааны халуун усны шугамуудын 70 гаруй хувь нь насжилт өндөртэй болсон. Эдгээр шугамуудыг ээлж дараалан солих асуудал яригдаж байна. Энэ жилээс эхлээд Австрийн технологиор цэвэр усны шугамуудыг солих биш, доторлогоог нь өөрчилнө. Шугам солихтой холбоотойгоор хотын ногоон байгууламжийн ажил хөндөгдөж байна. Энэ нь туннелийн нэгдсэн систем байхгүйтэй холбоотой. Шинээр баригдаж буй барилгуудад дэд бүтцийнх нь шугамуудыг туннелийн системтэй байлгах ёстой гэсэн шаардлагыг тавьж байна.