Ө.Энхтүвшин 2018.11.07 | Vip76.mn

Ө.Энхтүвшин: Прокурор шалгасан хэргүүдийнхээ дүнг яаралтай нийтэд мэдээлмээр байна

Өнөөдөр /2018.11.07/ УИХ-ын ээлжит бус чуулган хуралдаж байна. Улсын Их Хурлын гишүүн Б.Батзоригийн Улсын Их Хурлын гишүүний бүрэн эрхийг түдгэлзүүлэх тухай Монгол Улсын ерөнхий прокуророос ирүүлсэн саналыг хэлэлцлээ.

Монгол Улсын ерөнхий прокуророос ирүүлсэн саналд, Улсын Их Хурлын гишүүн Б.Батзориг нь “Засгийн газрын гишүүн, Хүнс, хөдөө, аж ахуйн сайдаар ажиллахдаа Жижиг дунд үйлдвэрийг хөгжүүлэх сангаас зээлийн санхүүжилт олгох шийдвэр гаргахдаа албаны бүрэн эрх, албан тушаалын байдлаа урвуулан ашиглаж бусдад давуу байдал бий болгосон” гэх эрүүгийн хэрэгт Авлигатай тэмцэх газар мөрдөн шалгах ажиллагаа явуулж, Нийслэлийн прокурорын газраас хяналт тавин ажиллаж байна.

Мөрдөн шалгах ажиллагааны явцад цугларсан нотлох баримтуудаар Улсын Их Хурлын гишүүн Б.Батзориг нь Монгол Улсын Эрүүгийн хуулийн тусгай ангийн 22.1 дүгээр зүйлийн 3 дахь хэсэгт заасан улс төрд нөлөө бүхий этгээд болох Засгийн газрын гишүүний эрх мэдэл, албан тушаалаа урвуулан ашиглах гэмт хэргийг үйлдсэн гэж үзэх нөхцөл байдал тогтоогдсон тул мөрдөгчийн эрүүгийн хэрэг үүсгэж яллагдагчаар татах саналыг прокурор хянаад үндэслэлтэй гэж үзэж 2018 оны 11 дүгээр сарын 5-ны өдөр эрүүгийн хэрэг үүсгэж яллагдагчаар татах тогтоол үйлдсэн тухай дурджээ.

Хэлэлцэх асуудлын дараалалтай холбоотойгоор гишүүд санал хэллээ.

УИХ-ын гишүүн Ө.Энхтүвшин:

“Гишүүдийн ярьж байгааг сонсоод толгой эргэж байна. УИХ ийм хууль гаргаад ийм байдалд орчлоо гэх. Гэтэл Прокурор Ц.Нямдорж сайд нарын яриа зөрөөд байна. Алдаа, буруугаа бие биерүүгээ чихсээр байгаад ирлээ. Үүнийгээ янзалмаар байна. Гишүүдийн хэлээд байгаа өмнөх их мөнгөн дүнтэй хэргүүд өнөөг хүртэл шийдэгдээгүй явж байна. Түүний хариуг бид мэдмээр байна. 60 тэрбум, Хөгжлийн банк, АСЕМ гэх мэт. Эдгээрээс үнэн худлыг нь хэл л дээ. Яагаад дүнг танилцуулахгүй байгаа юм. ЖДҮХС-ын зээлд УИХ-ын 50 орчим гишүүн холбогдолтой гээд л хэвлэлээр яваад байна. Үүнийг мэдэж байгаа хүн нь сэтгүүлчидэд мэдээлсэн байгаа. Үүний үнэн худлыг тогтоож мэдээлэхгүй бол УИХ үйл ажиллагаа явуулах боломжгүй болно. Мөн энэ зээлийг авахад МАН даалгавар өгсөн гэдэг яриа гарч байна. Үүний ч бас үнэн худлыг тогтоох хэрэгтэй.”