Хуульзүйн Байнгын хорооны өнөөдрийн хуралдаанаар Монгол Улс дахь Хүний эрх, эрх чөлөөний байдлын талаархи Хүний эрхийн Үндэсний Комисс (ХЭҮК)-ын 17 дахь илтгэлийг сонслоо.

Энэ үеэр байнгын хорооны гишүүд ХЭҮК-ын үйл ажиллагаанд сэтгэл дундуур байгаагаа илэрхийлж байв.

Тухайлбал УИХ-ын гишүүн Л.Болд “Хүний эрхийн илтгэл гээд том ном байсхийгээд л хэлэлцдэг. Монгол Улсад хүний эрх нь болоод ч байгаа юм шиг, эсхүл комисс нь болоод ч байгаа юм шиг, болохгүй ч байгаа юм шиг. Захын хүнээс очоод асуу, таны хүний эрх хангагдаж байна уу,  хүний эрхийн асуудлаар та сэтгэл хангалуун байна уу гэж. Хүмүүсийн 80, 90 хувь нь болохгүй байна аа л гэж хэлнэ. Өнөөдрийн хуулиар бол ХЭҮК-ийг буруутгах арга алга. Байгаа ажил нь цаас үйлдвэрлэх л ажил юм чинь. Зөвлөмж бичээд л цаас үйлдвэрлээд л судалгаа хийгээд яваад байдаг цаана нь аймшигтай хүний эрхийн зөрчил, хүний эрхийг уландаа гишгэсэн тогтолцоо амь бөхтэй байсаар л байгаа. Үндсэн хуулиараа хүний эрх гэдэг бол Монгол Улсын хамгийн эрхэмлэн дээдлэх зүйл гээд тунхаглачихсан, түүнийгээ хэрэгжүүлэх гэхээр ХЭКомисс нь шүдгүй арслан шиг л юм байж байдаг, арслан ч биш дээ бамбарууш ч юм уу юу ч юм. Бусад орнуудыг хараарай, тэр хүний эрхийн комисс, хүний эрхийн манаач байгууллагуудаасаа хууль, хүчнийхэн яаж айж чичирдэг вэ гэдгийг” хэмээсэн юм.

Мөн тэрээр С.Зоригийг хөнөөсөн хэргийн хэрэгтэй холбогдуулан хүний эрхийн зөрчлийн жишээг дурдав. “Хуульзүйн сайд нь хүртэл ярьж байна, хэргийн цорын ганц амьд гэрч нь гэрчлээд байхад тэр гурван хүнийг гурван шатны шүүхээр яллачихсан байна. Тэдэнтэй УИХ-ын хүний эрхийн дэд хорооны гишүүд очиж уулзсан. Гурвуулаа ямар мэдэгдэл хийж, ямар өргөдөл, гомдол гаргасныг та бүхэн харсан. Энэ хэргийг шийдвэрлэсэн тухай олон улсын байгууллагын санал дүгнэлт  хүртэл гарчихс байгаа. Хүний эрхийн комисст очихоор энэ асуудал руу орж боллохгүй байна гэдэг. Ийм л нөхцөл байдалтай байна. Одоо энэ асуудлаар УИХ-ын дэргэдэх Түр хороо байгуулах гэж байна. Түр хороон дээрээ энэ асуудлыг ярина. Яагаад 2017 онд өмнөх Засгийн газрын үед С.Зоригийн амийг хөнөөсөн хэргийн хөөн хэлэлцэх хугацаатай уялдуулж Эрүүгийн хуульд нэмэлт өөрчлөлт оруулав зэрэг асуултуудад хариулт авах болно. Дэлхийн хэмжээнд, олон улсын анхааралд орсон хүний эрхийн том зөрчил болчихоод байгаа учраас үүнийг бид шийдэхээс өөр арга байхгүй” хэмээн байр сууриа илэрхийлсэн юм.