​Л.Болд: Намаасаа гарах шийдвэрийг би гаргаагүй, ийм шийдвэрт хүрэх нөхцөлийг тэд бүрдүүлсэн
2019.01.24

​Л.Болд: Намаасаа гарах шийдвэрийг би гаргаагүй, ийм шийдвэрт хүрэх нөхцөлийг тэд бүрдүүлсэн

УИХ-ын гишүүн Л.Болдоос цаг үеийн асуудлаар зарим зүйлийг тодрууллаа. Тэрээр энэ сарын 17-нд намаасаа гарах өргөдлөө АН-ын анхан шатны байгууллагад өгөөд байгаа юм.

-Та энэ сарын 17-нд намынхаа анхан шатны байгууллагад намаас чөлөөлөгдөх өргөдлөө өгсөн гэсэн. Таны өргөдлийг шийдсэн үү?

-Би намдаа, намынхаа удирдлагад өргөдлөө өгсөн. Түүнийгээ ямар, ямар шатанд гарах ёстой дүрмийн дагуу холбогдох шатанд нь хандсан. Миний өргөдлийг хэрхэн шийдвэрлэх нь намын дотоод асуудал. Миний хувьд ямар нэгэн бүртгэлийн өргөдлөөс болоод хэн нэгэн хүнийг намын гишүүн гэж үзэх нь хууль зөрчсөн асуудал гэж үзэж байгаа. Иргэний хувьд шийдвэрээ гаргасан. Гэхдээ энэ шийдвэрийг би гаргаагүй намайг гаргах нөхцөлийг тэд бүрдүүлсэн.

-УИХ-ын дараагийн дарга хэн болох вэ гэсэн таамаг яваад эхэллээ. Ер нь УИХ-ын дараагийн даргад нэр дэвшүүлэхээр ямар ямар хүний нэр яригдаж байгаа вэ?

-Манай гишүүд янз бүрийн мэдээлэл авсан юм билээ. Ж.Батзандан гишүүн тодорхой хүмүүстэй уулзаад, тодорхой хүмүүсийн нэр яригдсан байналээ. Гэхдээ энэ хүнийг энэ хүнээр солино гэсэн зүйл байж болохгүй шүү дээ. УИХ-ын даргад хэн хэн  нэр дэвших вэ, нэр дэвшиж байгаа хүмүүс ямар үүрэг амлалт, үзэл бодол, ямар хөтөлбөр хэрэгжүүлэхийн төлөө явах вэ гэдгийг асууж байж шийдэх хэрэгтэй. Нөгөө талаар ард түмэн хүлээн зөвшөөрөх хэрэгтэй. Талбай дээр жагссан 50,60 мянган хүн ганц УИХ-ын даргыг огцруулах гэж ирэхгүй шүү дээ.

-Таны бодлоор УИХ-ын даргын болох боломжтой хүн энэ танхимд хэнийг гэж үзэж нэрлэх вэ?

-Зөндөө л байгаа. Яг нэр зааж хэлбэл нэг хүнийг нөгөө хүнээр солих гэж байгаа юм шиг болох гээд байна. Тиймээс ямар нэгэн нэр хэлмээргүй байна. Зүгээр л тухайн хүнд тавигдах шаардлага, хийх ажил, олон түмний хүлээлт ямар байгаа гэдгийг л харах хэрэгтэй. 

-МАН-ын 27-ын талаас УИХ-ын дарга томилно гэсэн мэдээлэл гараад эхэлсэн?

-Дотроо албан тушаалтын хуваарилалт хийгээд явах нь маш зохисгүй үйлдэл. Үнэхээр олон түмний хүсэн  хүлээж байгаа, ажил хийж чадах, энэ хүнийг гүйцэж чадах хүмүүсээ нээлттэй хэлэлцүүлж байгаад ил тодоор чадвартай хүмүүсээ томилдог тогтолцоо руу орохгүй бол болохгүй. Бид яагаад“60 тэрбум”-ын хэргийг ингэж шүүмжлээд байна гэхээр Монголын төрийн бүх албыг наймааны хэрэгсэл болгочихоод байгаа. Түүнийг бүр хуульчилчихаад байна. Тиймээс МАН-ын 27-н гишүүнээс УИХ-ын даргыг томилох ямар ч үндэслэл байхгүй. Хэрвээ тэгвэл М.Энхболд даргыг өөрчлөөгүйтэй адил. Яг хуучин бодлогыг нь явуулаад цаг хожоод дахид л хөдөлгөж болдоггүй бул хар чулуу тавина гэсэн үг шүү дээ.