Л.Мөнхбаатар 2019.04.18 | Vip76.mn

Л.Мөнхбаатар: Хөвсгөл аймгийн Эрчмийн нурууг тусгай хамгаалалтад яаралтай авах хэрэгтэй

УИХ-ын нэгдсэн чуулганы өнөөдрийн /2019.04.18/ хуралдааны эхэнд “Зарим газар нутгийг улсын тусгай хамгаалалтад авах тухай” Улсын Их Хурлын тогтоолын төслийг хэлэлцэж байна. 

Тогтоолын төслийн агуулга нь есөн аймгийн 22 газрыг улсын тусгай хамгаалалтад нэмж авах тухай юм. Эдгээр 22 газар нь нийтдээ 9 аймгийн 29 сумын 3.4 сая га талбайг хамарч байгаа ажээ.

Эдгээр газрыг улсын тусгай хамгаалалтад авснаар байгалийн өвөрмөц тогтоц, унаган төрх, түүх, соёлын дурсгалууд болон 350 орчим зүйлийн ховор амьтан, ургамал, гол мөрний урсац бүрэлдэх эхийн 3.7, ойн сан бүхий газрын 3.2 хувь хамгаалагдах тухай судалгааны дүн гарчээ.

Мөн улсын тусгай хамгаалалттай газар нутгийн талбайн хэмжээ 3.4 сая га буюу 2.1 хувиар нэмэгдэж, нийт нутаг дэвсгэрийн 19.8 хувь нь улсын тусгай хамгаалалттай болох юм байна.

Тогтоолын төсөлтэй холбогдуулан УИХ-ын гишүүд асуулт асуулаа.

УИХ-ын гишүүн Л.Мөнхбаатар:

"Энэ төсөлд Хөвсгөл аймгийн Цэцэрлэг, Цагаан-Уул, Шинэ-Идэр, Бүрэнтогтох сумыг дамнасан Булна нуруу, Тэсийн голын савыг оруулсан. Тэсийн гол бол Хөвсгөл, Завхан, ОХУ-ын Тувагаар дамнан усрдаг хамгийн том гол. Сүүлийн жилүүдэд их бохирдсон тул хамгаалалтанд авах шаардлагатай болсон. Булна нуруунд бол ховордсон амьтад бий.

Цаашид Хөвсгөл аймагт тусгай хамгаалалтад авах шаардлагатай хэд хэдэн газар байгаа. Үүнээс гадна Эрчмийн нурууг хамгаалалтад хэзээ оруулах вэ?"