Б.Батзориг 2019.04.18 | Vip76.mn

Б.Батзориг: Тусгай хамгаалалтаас гаргах шаардлагатай газрууд цөөнгүй байна

УИХ-ын нэгдсэн чуулганы өнөөдрийн /2019.04.18/ хуралдааны эхэнд “Зарим газар нутгийг улсын тусгай хамгаалалтад авах тухай” Улсын Их Хурлын тогтоолын төслийг хэлэлцэж байна. 

Тогтоолын төслийн агуулга нь есөн аймгийн 22 газрыг улсын тусгай хамгаалалтад нэмж авах тухай юм. Эдгээр 22 газар нь нийтдээ 9 аймгийн 29 сумын 3.4 сая га талбайг хамарч байгаа ажээ.

Эдгээр газрыг улсын тусгай хамгаалалтад авснаар байгалийн өвөрмөц тогтоц, унаган төрх, түүх, соёлын дурсгалууд болон 350 орчим зүйлийн ховор амьтан, ургамал, гол мөрний урсац бүрэлдэх эхийн 3.7, ойн сан бүхий газрын 3.2 хувь хамгаалагдах тухай судалгааны дүн гарчээ.

Мөн улсын тусгай хамгаалалттай газар нутгийн талбайн хэмжээ 3.4 сая га буюу 2.1 хувиар нэмэгдэж, нийт нутаг дэвсгэрийн 19.8 хувь нь улсын тусгай хамгаалалттай болох юм байна.

Тогтоолын төсөлтэй холбогдуулан УИХ-ын гишүүд асуулт асуулаа.

УИХ-ын гишүүн Б.Батзориг:

"Надад 3 тодруулга байна. 

1. Эрдэнэт-Овоотын чиглэлийн төмөр замын трасс тусгай хамгаалалтад авах газар нутагтай давхцаж байна. үүнийг яах ёстой вэ? Дараа нь нөхөн төлбөрийн асуудал үүсэх эрсдэл байгаа юм биш үү? 

2. Тусгай хамгаалалтад авахаас гадна тусгай хамгаалалтаас гаргах шаардлагатай газрууд байна. Жишээлбэл, БЗД-ийн 20-30 жил тэр газраа амьдраад байшин, хашаагаа барьсан иргэд байна. Хонхор, Төр хурах, Баянзүрхийн товчоонд байгаа 500 өрхийн газрын асуудал хэцүүднэ. Сонгуулиар шийднэ гэж амалсан. Шийдвэрээ хүлээж л байна. Энэ хэзээ шийдэгдэх вэ?

3. Тусгай хамгаалалтад газар нутгаа аваад байдаг гэтэл малын тоо толгой өссөөр байна. Бэлчээр хүрэлцэхгүй байна. Отрын бүс нутаг давхцаад байна. Худаг ус хэрэгтэй байна. Энэ давхцалыг хэрхэн зохицуулах гэж байна вэ?"