Аюулгүй байдал, гадаад бодлогын байнгын хорооны өнөөдөрийн /2019.06.12/ хуралдаанаар “Эрдэнэт үйлдвэр” ХХК-ийн үйл ажиллагааны тухай Монгол Улсын болон Оросын Холбооны Улсын Засгийн газар хооронд байгуулсан хэлэлцээрийг соёрхон батлах тухай хуулийг хүчингүй болсонд тооцох тухай хуулийн төсөл болон хамт өргөн мэдүүлсэн Протокол соёрхон батлах тухай хуулийг хүчингүй болсонд тооцох тухай хуулийн төсөлийн анхны хэлэлцүүлгийг хийлээ.

Энэ үеэр УИХ-ын гишүүн Б.Бат-Эрдэнэ:

"Эрдэнэт" үйлдвэрийн  захирлын  цалин, болон нийгмийн хангамжийн талаар  мэдээлэл өгнө үү? Зайсанд хамгийн үнэтэй хороололд маш өндөр үнэтэй хаус худалдаж авсан тухай мэдээлэл гарсан. Үе үеийн захирлуудад хангамж ямар байсан бэ? Таныг ажил авахаас өмнө аль аль захирлуудад ямар хаус авч өгсөн бэ?

Мөн  49 хувийн маргаантай асуудлыг бид 2016 оноос хойш ярьж байгаа. 51 хувийг тухайн үед төрийн өндөр ажил алба хашиж байсан хүмүүсийн нөлөөгөөр  хэн нэгэнд давуу байдал болгож, үүнээс шалтгаалан Эрдэнэт үйлдвэр өөрөө эрсдэлд орсон.

Стандарт банкинд 100 гаруй сая ам.долларын өрөнд орсныг Эрдэнэт үйлдвэрийн Эрсдэлийн сангаас төлж барагдуулснаа ихэд гавьяа байгуулсан  мэтээр ярьж байгаа. Гэтэл нөгөө талд анх өр тавьж зувчуулсан хүмүүсээс 40 сая ам.долларыг яаж авах юм бэ. Хууль хяналтын байгууллагын хариуцах ажил гээд асуудлыг хаях юм уу?