Б.Бат-Эрдэнэ Л.Оюун-Эрдэнэ 2019.07.16 | medee.mn

Хэнтий аймгийн нутгийн зөвлөл залуу аваргадаа таван өрөө байр бэлэглэлээ

Хэнтий аймгийн нутгийн зөвлөл залуу аваргадаа таван өрөө байр бэлэглэлээ

Ардын хувьсгалын 98 жилийн ой, Үндэсний их баяр наадмын хүчит бөхийн барилдаанд Хэнтий аймгийн Өмнөдэлгэр сумын харьяат Улсын арслан Э.Оюунболд түрүүлж, 26 насандаа Монгол Улсын Аварга цол хүртсэн билээ. Тэрээр Хан Хэнтий нутгаас 30 жилийн дараа Улсын Аварга цол хүртсэн бөх болж байгаа юм. 30 жилийн тэртээ, 1989 оны Ардын хувьсгалын 68 жилийн ойн баяр наадмаар Хэнтий аймгийн Өмнөдэлгэр сумын харьяат Монгол Улсын Дархан Аварга Б.Бат-Эрдэнэ 25 настайдаа хоёр дахиа түрүүлж, Улсын Аварга цол хүртэж байсан билээ. Цагийг эзэлсэн Их Аваргын төрсөн нутгаас ийн 30 жилийн дараа Улсын Аварга цолтон төрж буй юм.

Өнөөдөр /2019.7.13/ Хэнтий аймгийн Нутгийн зөвлөлөөс залуу Аварга Э.Оюунболдыг хүлээн авч, хүндэтгэл үзүүлжээ. Э.Оюунболдын Аварга цолыг мялааж Нутгийн зөвлөлөөс нь таван өрөө байр бэлэглэснийг УИХ-ын гишүүн, ЗГХЭГ-ын дарга, Хэнтий аймгийн Нутгийн зөвлөлийн дарга Л.Оюун-Эрдэнэ, УИХ-ын гишүүн, Монгол Улсын Дархан аварга Б.Бат-Эрдэнэ нар гардуулан өгсөн байна.

image

Энэ үеэр Хэнтий аймгийн Нутгийн зөвлөлийн дарга Л.Оюун-Эрдэнэ "Монгол түмэн цэл залуухан Аваргаа хайр, хүндлэлээрээ өлгийдөн авлаа. Төрийн наадамд 12 түрүүлсэн Их аварга багшийнхаа амжилтад хүрэхийн төлөө түмэн олныхоо итгэлийг даахыг төлөө хичээгээрэй гэж Монгол түмэн захиж байгааг дамжуулъя. Монголын ард түмэнтэй нэгэн адил Хан Бурхан халдун нь хамт хазайж, Хатан Хэрлэн, Онон нь хамт цалгиж, Хан Хэнтийчүүд бахархан наадлаа" хэмээв. Дашрамд дурдахад Улсын залуу Аварга Э.Оюунболд өнгөрсөн жилийн наадмаас хойш ОХУ-д тусгайлсан бэлтгэл хийсэн байна.