“Ньюкроп” ХХК нь 1995 оноос тус суманд газар тариалангийн үйлдвэрлэл эрхэлж эхэлсэн бөгөөд шинжлэх ухаан, орчин үеийн дэвшилтэт технологийг үйл ажиллагаандаа нэвтрүүлэн, усалгаатай тариалан, эрчимжсэн мал аж ахуйг хослуулан хөгжүүлэх зорилготойгоор байгуулагдсан. 2004 оноос эхлэн усалгаатай тариалангийн боломжит таримлуудын технологийг судалж, үрийн нөөц бүрдүүлэх ажлыг эрчимжүүлж эхэлсэн бөгөөд энэ хүрээнд тариалангийн нэр төрлийг өргөжүүлэн улаанбуудай, овьёос, төмс, шар лууван, сонгино зэрэг 5-6 төрлийн таримлыг сэлгээнд оруулан тариалж байна.

Тус компани нь 364 га болон 114 га бүхий хоёр талбайдаа тариалан эрхэлж байгаа бөгөөд эдгээр талбай нь Орхон голоос ердөө 400 орчим метрийн зайд байрладаг давуу талаа ашиглан, усалгааны өндөр хүчин чадалтай техникээр тоноглогдсон орчин үеийн усалгааны систем байгуулан ажиллаж байна. 2024 онд улаанбуудай 350 га талбайгаас 510 тн, хүнсний ногоо 40 га талбайгаас 935 тн ургац хураан авсан амжилт үзүүлжээ.

Эдгээр амжилт нь тус хамт олны уйгагүй хөдөлмөр, шинэ технологи нэвтрүүлэн, шинжлэх ухаанд суурилсан хөдөө аж ахуйн арга барилыг үр дүнтэй ашигласны илрэл юм. Улс орныхоо хүнсний аюулгүй байдалд үнэтэй хувь нэмэр оруулж буй “Ньюкроп” ХХК-ийн хамт олонд цаашдын ажил үйлс нь тариан түрүү мэт арвижин дэлгэрч байхын ерөөл дэвшүүлье.