Улсын Их Хурлын даргын 91 дүгээр захирамжаар байгуулагдсан “Хэвлэл мэдээллийн эрх чөлөөг хангах талаарх хууль тогтоомжийг боловсронгуй болгох санал, дүгнэлт боловсруулах, холбогдох хуулийн төсөл боловсруулах үүрэг бүхий ажлын хэсэг”-ийн хурал өчигдөр /2025.04.01/ боллоо.

Тус хуралдааныг ажлын хэсгийн ахлагч, Улсын Их Хурлын гишүүн Ч.Лодойсамбуу даргалж, Улсын Их Хурлын гишүүн Ж.Золжаргал, С.Лүндэг, Э.Болормаа, Л.Мөнхбаясгалан, Д.Энхтуяа, Б.Батбаатар нар оролцлоо.

Хурлын эхэнд Парламентын судалгаа, хөгжлийн хүрээлэнгээс гаргасан хэвлэл мэдээллийн эрх чөлөөг хангах, эрх зүйн орчинтой холбоотой судалгааг хуульч, зөвлөх П.Эрхэмбаяр танилцуулав. Энэ талаар гишүүд санал солилцож, асуудлын хүрээнд харилцан зөвлөлдлөө.Ажлын хэсгийн ахлагч Ч.Лодойсамбуу хэвлэлийн эрх чөлөөний тухай хуулийг боловсронгуй болгох хэрэгцээ, шаардлага бий гэдгийг тодотгов. Улсын Их Хурлын гишүүн Э.Болормаа ардчиллыг бэхжүүлэх суурь асуудалд илүү анхаарч, эрсэдлийг тооцоолох нь чухал гэлээ.

Улсын Их Хурлын гишүүн Д.Энхтуяа хэвлэл мэдээллийн салбар өөрийн гэсэн зохицуулалт байхгүй. Нөхцөл байдлаас шалтгаалаад үүнийг төр хийж байгаа талаарх асуудлыг хөндсөн бол Улсын Их Хурлын гишүүн Л.Мөнхбаясгалан мэдээлэл авах үйл ажиллагааг илүү нээлттэй болгох нь зүйтэй гэлээ.

Түүнчлэн тус ажлын хэсгээс хуулийн үзэл баримтлал дээр илүү төвлөрөн асуудлыг тал талаас нь шинжлэн судалж, дахин хэлэлцэх нь зүйтэй гэж тогтлоо.