УИХ-ын чуулганы /2025.04.04/-ний өдрийн хуралдаанаар Зөвшөөрлийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийн хэлэлцэх эсэхийг хэлэлцлээ.

Хэлэлцэж буй асуудалтай холбогдуулан гишүүд асуулт асууж, байр сууриа илэрхийллээ.

УИХ-ын гишүүн О.Батнайрамдал:

Зөвшөөрлийн тухай хуульд нэмэлт өөрчлөлт оруулах хуулийг бол 100% дэмжиж байгаа. Цахим мөрийтэй тоглоомын үйл ажиллагаа эрхлэх, сурталчлан уриалахыг бид аль түрүүн л хориглочихсон байх ёстой байсан. Энэ нь зөвхөн Монгол Улсад тулгамдаж байгаа асуудал биш юм. Яг манайх шиг ийм асуудалтай маш олон улс байгаа. Өнөөдөр бид валютын урсгалаар хэмээн яриад байна. Бид нар ямар ашигтай бизнес хийх гэж байгаа биш дээ! 

Учир нь цахим мөрийтэй тоглоом алгоритмаар манипуляц хийсэн "платформ" юм. Нэг утгаараа цахим мөрийтэй тоглоом нь залилан. Дээрээс нь оюутан, залуучуудын дунд донтолт болдог. Энгийнээр бол үндэстэн дамнасан мөнгө угаалтын хэрэг юм. Үүн дээр төр гэж байдаг л юм бол яаралтай зохицуулалт хийх ёстой.

Сүүлийн 5 жилийн хугацаанд 1,3 тэрбум доллар валютын урсгал гадагшаа явлаа гэх. Гэхдээ 1,3 тэрбум доллар гадагш урсаж байгаа валют болгон чинь хэн нэгэн айлын өр болж үлдээд байна. Бэлэн мөнгөтэйдөө эсвэл илүүдэл мөнгөтэйдөө тоглож байгаа нэг ч хүн байхгүй. Дандаа хэн нэгнээс зээл авч, байраа барьцаанд тавьж тэр битгий хэл сургалтын төлбөрөөрөө тоглосон оюутнууд зөндөө байгаа. Тэгэхээр тэр олон мянган айлын амьдралын санхүүд сүйрэл авчирч байгаа залилан. Тоон дүнг нь аваад үзвэл 2024 онд 578 сая доллар гэж байгаа. Тэгэхээр 2024 онд 578 сая доллар айл өрхийн "нэмэлт өр" болоод үлдэж байна.Тэгэхээр тэр айл өрхийг бид яах вэ?

Олон мянган залуучууд донтоод үлдэж байгаа. Энэ нь алгоритмаар манипуляц хийгээд маш өндөр ашиг хийдэг залилангийн л бизнес. Тэгэхээр үүн дээр бид нар яаралтай зохицуулалт хийх ёстой. Алдаж байгаа мөч хором болгон хэн нэгэн айлын өр болж л үлдэх, хэн нэгэн айлын салалт, хэн нэгэн айлын хэрүүл болж үлдээд байна. Ганцхан энэ хуулийг бид нар баталлаа гээд асуудал тэр чигээрээ шийдэгдчихгүй. Цаана нь үлдэж байгаа үр дагавартай бид нар хэрхэн тэмцэх вэ? Эргээд оюутан залуусын дунд ч гэсэн санхүүгийн боловсролын асуудал яригдана. Тэгэхээр иймэрхүү төрлийн шинэ гарч ирж байгаа гэмт хэргүүд шинэ гарч ирж байгаа донтолт залилангуудтай бид цаашдаа хэрхэн тэмцэх вэ?