МОНГОЛ УЛСЫН ИХ ХУРЛЫН ГИШҮҮН

Д.Сарангэрэл: Эмч сувилагчдын цалинг 49 хувь нэмэх шаардлагатай
УИХ-ын гишүүн, Эрүүл мэндийн сайд Д.Сарангэрэл
2018.05.16
Хүн ам, Нийгмийн хамгаалал, Хөдөлмөр

Д.Сарангэрэл: Эмч сувилагчдын цалинг 49 хувь нэмэх шаардлагатай

Эрүүл мэндийн салбарынхан цалингаа нэмүүлэхийг шаардаж, Сүхбаатарын талбайд тодорхойгүй хугацаагаар суулт зарласан. Энэ асуудлыг хэрхэн шийдвэрлэж ажиллах талаар Эрүүл мэндийн сайд Д. Сарангэрэлээс тодрууллаа.

-Эмч сувилагчид цалингаа нэмүүлэхийг шаардаж байна. Цаашид ажил хаялт зарлана гэдгээ мэдэгдээд байгаа. Салбарын сайдын хувьд энэ асуудлыг хэрхэн шийдвэрлэхээр ажиллаж байна вэ?

-Эмч, сувилагч, эрүүл мэндийн салбарынхан цалингаа нэмүүлэхээр жагсаал зохион байгуулж, асуудал дэвшүүлж байгааг хүлээн зөвшөөрч байгаа. Сайдын хувьд арваад аймагт ажиллалаа. Орон нутагт жагсаал болоогүй ч уулзаад ярилцахад цалин нь хүрэлцэхгүй, амьдрал хэцүү байгааг ярьдаг.

Сувилагчид гар дээрээ 468 мянган төгрөг, ахмад сувилагч оны нэмэгдэл гэж тооцоод сард 500 мянган төгрөгийн цалин авч байна. Эрүүл мэндийн салбарынхан, тэр дундаа сувилагчдын дунд өр зээлгүй хүн алга. Авч буй цалингаа банкны зээлд өгч байна. Тиймээс цалинг нь 5-10 хувиар нэмнэ гэхээсээ илүүтэйгээр Засгийн газрын мөрийн хөтөлбөр, Эрүүл мэндийн яамны (ЭМЯ) бодлоготой холбоотойгоор ажлын үр дүнтэй нь уялдуулж, хийснээр нь үнэлдэг байхыг чухалчилж байна. Өөрөөр хэлбэл, зах зээлтэй уялдан хийсэн зүйлийг нь үнэлдэг байхыг чухалчилж байгаа. Хөдөлмөр, нийгмийн хамгааллын яам, ЭМЯ ажлын хэсэг гарган эрүүл мэндийн салбарын 30 гаруй байгууллагын 2600 хүнийг оролцуулан ажлын байрны үнэлгээ хийсэн. Ингэхэд мэс засал, нярайн сувилагчид ажлын ачаалал өндөр, ажлын байрны нөхцөл хүнд байсан. Үүнийг олон улсын стандарттай уялдуулахад тэдний цалинг 7-49 хувь нэмэх шаардлагатай байсан.

-Цалин нэмэх хүлээлт бас багагүй хугацаа авч байгаа. Яг хэдийд эрүүл мэндийн салбарынхны цалинг 50 орчим хувиар нэмэх боломжтой гэж харж байгаа вэ?

-Яам болон Засгийн газар ажил хөдөлмөрт нь тохирсон цалин олгох байр суурьтай байгаа. Эрүүл мэндийн яамны зүгээс өөрсдөөс шалтгаалах ажлыг хийсэн. Судалгаа явууллаа, тооцоогоо хийлээ, журмаа гаргалаа. Одоо УИХ-аар 2019 оны төсөвт суулгуулж, эдгээр хийсэн зүйлийг ажил хэрэг болгох ёстой.

-Эмч, сувилагчид ажил хаялт зарлана гэдгээ мэдэгдсэн. Салбарын яам болон эрүүл мэндийн байгууллагын удирдлагуудын зүгээс ямар арга хэмжээ авч ажиллах бол?

-Эрүүл мэндийн яам энэ асуудлыг зохицуулахаар нэг ч өдөр гар хамхиж суугаагүй. Гэхдээ 2019 оны төсөвт мөнгө суулгахыг хүлээх хэцүү байна. Сангийн сайдын гаргасан 47 дугаар тушаалын дагуу Эрүүл мэндийн байгууллага улсаас авч байгаа төсвөө салбар дотроо ашиглаж болох юм. Тухайлбал, цахилгаанаас хэмнэсэн мөнгөө тухайн эрүүл мэндийн байгууллага бие даан ашиглах эрхтэй болж байгаа. Мөн эрүүл мэндийн байгууллага аж ахуйн нэгжүүдтэй гэрээ хийж амралтын өдрөөр урьдчилан сэргийлэх үзлэг явуулах, оношилгоо эмчилгээг төлбөртэй хийх эрхтэй болсон. Эндээс олсон орлогоо өөрсдөдөө зарцуулж болно. Гуравдугаарт, эрүүл мэндийн байгууллага нормоос давсан орлогоо мөн дотооддоо ашиглаж болно. Тиймээс энэ мөнгөөр тулгамдаж буй асуудлаа шийдвэрлэх боломж олгож байгаа. Одоогоор бидэнд ийм л боломж байна.

Б.ТУУЛ

ШИНЭ МЭДЭЭ