Нийгмийн бодлогын байнгын хорооны өчигдрийн хуралдаанаар Н.Учрал нарын таван гишүүн 2020 оны 5 дугаар сарын 13-ны өдөр өргөн мэдүүлсэн  Хувийн тэтгэврийн тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх эсэхийг хэлэлцсэн. Гишүүдийн олонхи дэмжээгүй учраас  хуулийн төслийг буцаасан. 

Тэтгэврийн шинэчлэл хийснээр:

Бид цалингаасаа 24 хувийг НДШ-т төлдгөөс 17 хувийг нь тэтгэврийн санд тогтмол төлдөг. 17 хувиас 8.5 хувийг нь ажилчин өөрөө, үлдсэн 8.5 хувийг нь ажил олгогч төлдөг.

Тэгвэл Хувийн тэтгэврийн сангийн тухай хууль батлагдсанаар өмнө нь төлдөг байсан 17 хувиасаа дөрвөн хувийг хувийн тэтгэврийн санд төлөх сонголт хийх эрхзүйн орчин бий болох ажээ.

Дунджаар 800,000 төгрөгийн цалинтай хүн бол сар болгон төлдөг 17 хувиасаа дөрвөн хувийг хувийн тэтгэврийн санд сонголт хийн байршуулснаар, түүнд хуримтлал үүсч, хүүгээс хүү тооцон, 30 жилийн дараа гэхэд 76 сая төгрөгийн хуримтлалтай болох юм.

Хуулийн төсөлтэй холбогдуулж Засгийн газрын бодлоготой уялдуулж оруулж ирж хэлэлцэе гэсэн байр суурийг Улсын Их Хурлын гишүүн С.Чинзориг илэрхийлсэн. Тэрбээр Тэтгэврийн шинэчлэлийг эсэргүүцэж байгаа зүйл байхгүй. Зарчмын хэд хэдэн асуудал байгаа. Нийгмийн даатгалд төлж байгаа шимтгэлээс дөрвөн хувийг хувийн тэтгэврийн санд төвлөрүүлэх талаар тусгасан байсан. Үүнийг иж бүрнээр хийх хэрэгтэй. Цаашлаад тогтолцооны асуудлыг шийдэх. Нэмэлт даатгалын хэлбэрээр явах уу, албан журмын хуримтлалын сан хэлбэртэй байх юм уу гэдгийг шийдэх хэрэгтэй. Яамны зүгээс нэмэлт даатгалын хэлбэрээр байх ёстой гэж үзэж байгаа.