Б.Ганхуяг захирлын “Сая тонн-Сая мод” аяныг олон нийт дэмжиж байна
2021.09.30
Байгаль Орчин, Аялал жуулчлал

Б.Ганхуяг захирлын “Сая тонн-Сая мод” аяныг олон нийт дэмжиж байна

Ерөнхийлөгч У.Хүрэлсүх НҮБ-ын индэр дээр Монгол Улс 2030 он хүртэл нэг тэрбум тарина гэсэн мэдэгдлийн шилийг даран “Эрдэнэс Тавантолгой” төрийн өмчит компанийн захирал Б.Ганхуяг “Сая тонн-Сая мод” аян эхлүүлж байгаагаа зарлажээ. Монгол Улсын эдийн засгийг тэтгэх, төсвийг бүрдүүлэхэд онцгойлон үүрэг гүйцэтгэдэг төрийн өмчит компанийн захирал ийнхүү сая саяар мод тарихаар зорилт тавьж байгааг нийт монголчууд маш таатай хүлээн авлаа. Цөлжилт хүрээгээ тэлж байгаа энэ үед зөв зүйтэй уриалга болов.

Энэ тухайд Б.Ганхуяг захирал хэлэхдээ “Сая тонн-Сая мод аяны хүрээнд нэг тонн нүүрс тутамд нэг мод тарих бөгөөд үүнийгээ “А6-20” бизнес төлөвлөгөөндөө тусгаж, компани нь 2030 он хүртэл төлөвлөгөөний дагуу 176 сая тонн нүүрс олборлох төлөвлөгөөний дагуу ажиллаж байгаа учраас “Сая тонн-Сая мод” зорилтын хүрээнд 2030 он гэхэд цөлжиж буй говь тал нутагт 176 сая ширхэг мод тарина” хэмээн дурдсан байна. Өчигдрийн хувьд Сангийн сайд Б.Жавхлан “Ирэх 2022 онд Монгол Улс 36 сая тонн нүүрс экспортлох зорилт тавьсан” хэмээн мэдэгдэж байна. Тэгэхээр айсуй 2022 онд “Эрдэнэс Тавантолгой” компани 36 сая мод тарина гэсэн үг.

Өнөөдөр Монгол Улсад цөлжилт бий болж эхэлсэн, тэр тусмаа говь нутагт цөлжилт ихээхэн явагдаж байгаа учраас “Эрдэнэс Тавантолгой” компанийн гаргасан санаачилга нь илүү олон хүнийг мод тарих хүсэл тэмүүлэлд хөтөлж байгаа нь сайн хэрэг. Мэргэжилтнүүдийн үзэж байгаагаар 2000 орчим мод тарьсан газрыг ойн сан гэж үздэг. Тэгэхээр тус компани ирэх найман жилд 10 мянга шахам ойн сан бүрдүүлж өгөх аж.

ШИНЭ МЭДЭЭ