ОХУ-ын Засгийн газрын орлогч дарга А.Л.Оверчук Монгол Улсад хийж буй ажлын айлчлалынхаа хүрээнд Монгол Улсын Ерөнхий сайд Л.Оюун-Эрдэнэд өнөөдөр бараалхав.

Ерөнхий сайд Л.Оюун-Эрдэнэ Монгол, Оросын дипломат харилцаа тогтоосны түүхэн 100 жилийн ойн босгон дээр  айлчилж буй ОХУ-ын Засгийн газрын орлогч даргад талархал илэрхийлэв.

ОХУ-ын Засгийн газрын орлогч дарга А.Л.Оверчук хоёр орны ард түмэн өнгөрсөн хугацаанд ямагт ойр байж, түүхэн сорилт бэрхшээлүүдийг хамтдаа даван туулж ирснийг тэмдэглээд дэлхийн II дайны хүнд жилүүдэд Монгол Улс хамгийн идэвхтэй дэмжлэг үзүүлж ирснийг Оросын ард түмэн хэзээ ч мартахгүй гэлээ.

Талууд 100 жилийн ой тохиож буй 11 дүгээр сарын 5-ны өдрийг угтан олон жил шийдлээ хүлээж буй өр зээл, үл хөдлөх хөрөнгийн асуудлыг шийдвэрлэж, эдийн засгийн хамтын ажиллагааны шинэ зууныг эхлүүлэх нь зүйтэй гэдэгт санал нэгдэв. Мөн дээд, өндөр түвшний харилцан айлчлал, цахим уулзалт зохион байгуулах талаар санал солилцож, энэ үеэр хэрэгжүүлж болох зарим томоохон төсөл, хөтөлбөрийн талаар ярилцах боломжтойг онцлов.

Монгол Улсын Ерөнхий сайд Л.Оюун-Эрдэнэ, ОХУ-ын Засгийн газрын орлогч дарга А.Л.Оверчук нар уулзалтын төгсгөлд хоёр улс төдийгүй, Монгол-Евразийн эдийн засгийн холбоо хооронд бодит хамтын ажиллагааг хөгжүүлэх ихээхэн нөөц бололцоо байгааг тэмдэглэж, цахим засаглал, хилийн боомтуудын дэд бүтцийг сайжруулах, эдийн засгийн чөлөөт бүсийг хөгжүүлэх, хил, гаалийн хяналтыг хөнгөвчлөх, стандартыг уялдуулах чиглэлд хамтын ажиллагааг чиглүүлэх нь зүйтэй гэж үзэв.

Монгол Улс, Евразийн эдийн засгийн холбоо хооронд чөлөөт худалдааны хэлэлцээр байгуулах боломжийг судлах хамтарсан судалгааны ажил амжилттай үргэлжилж буйг сайшааж, судалгааны дүнг ойрын хугацаанд гаргана гэдэгт итгэлтэй байгааг илэрхийлэв.