Өнгөрөгч наймдугаар сарын 5-ны өдөр олон улсын тогорууны “International Crane Foundation"сан Хурх-Хүйтэний хөндийн байгалийн нөөц газрын хамгаалалтын захиргааны үүргийг “Зэрлэг амьтан судлах, хамгаалах төв” /Wildlife Science and Conservation Center of Mongolia/ гэрээгээр гүйцэтгэхэд дэмжлэг үзүүлэхээ илэрхийлж, Байгаль орчин, аялал жуулчлалын яамны Төрийн нарийн бичиг дарга Э.Баттулгатай уулзалт хийсэн билээ.

Хурх-Хүйтэний хөндий бол дэлхийн хэмжээнд ховордож буй цэн тогоруу, цагаан тогоруу, хар тогоруу, хошуу галуу, хонин тоодог зэрэг шувуудын түшиц нутаг юм. Олон улсын ач холбогдлыг нь үнэлэн 2004 онд "Рамсарын конвенци"-д, 2009 онд Шувуудад чухал газарт, 2011 онд Зүүн Ази-Австралийн шувууны нүүдлийн замд бүртгэсэн байдаг.

Дээрх санал ажил хэрэг болж, хэрэгжсэнээр Тусгай хамгаалалттай газрын судалгаа, санхүүжилт, менежментийг шинэлэг аргаар явуулах ажил нэг шат урагшлах боломжтой юм. Байгаль орчин, аялал жуулчлалын сайд Б.Бат-Эрдэнэ өнөөдөр энэхүү ажлыг дэмжиж буйгаа илэрхийлж, талууд хамтран ажиллах санамж бичигт гарын үсэг зурлаа.

Олон улсын тогорууны сан нь “International Crane Foundation сан” дэлхийн 50 гаруй улс оронд тогоруу хамгаалах, болон тухайн бүс нутагт оршин амьдардаг иргэдэд дэмжлэг үзүүлэх чиглэлээр үйл ажиллагаагаа явуулдаг.