2024.01.19-20-ны өдрүүдэд УИХ-ын гишүүн Б.Дэлгэрсайхан, Т.Энхтүвшин нар Монгол улсын Засгийн газраас дэвшүүлсэн“Бүсчилсэн хөгжлийг дэмжих жил-2024”-д тусгагдсан хууль тогтоомж, ажлын талаар иргэдэд танилцуулга хийн, Сайншанд, Замын-Үүд сумдад ажиллаж байна.

Мөн, Монгол Улсын Засгийн газраас 2024 оныг "Бүсчилсэн хөгжлийг дэмжих жил" болгож зарласны хүрээнд “Шинэ сэргэлтийн бодлого”-д тусгагдсан дийлэнх төслүүдийг төр, хувийн хэвшлийн түншлэлээр хэрэгжүүлэх зорилт тавьсан. Энэ хүрээнд Төр, хувийн хэвшлийн түншлэлийн тухай хуулийг Засгийн газраас боловсруулж, УИХ-аар батлуулсан. Энэхүү анхдагч хуулийг 2024 оны 01 дүгээр сарын 01-нээс хэрэгжүүлж эхэлж байна. Хуулийг хэрэгжүүлэхэд Засгийн газрын баталгаа гаргах, түншлэлийн гэрээ байгуулах, зөвшөөрөл олгох зэрэгт дагаж мөрдөх журам, аргачлалыг Засгийн газрын хуралдаанаар хэлэлцэж баталсан билээ.

Мөн, Монгол Улсын 2023 оны Намрын чуулган өндөрлөсөнтэй холбогдуулан орон нутагтаа ажиллаж /2024.01.19/ 2023 оны намрын чуулганаар хэлэлцэн батлагдсан хууль, тогтоомж, бодлого шийдвэрийн талаар иргэдэд танилцуулж байна.

МОНГОЛ УЛСЫН ШАДАР САЙД ДОРНОГОВЬ АЙМАГТ АЖИЛЛАЖ БАЙНА

Монгол Улсын Шадар сайд, УОК-ын дарга Сайнбуянгийн Амарсайханы хамт /2024.01.18/ Дорноговь аймгийн өвөлжилт хүндэрсэн сумдад ажиллаж байна. Зудын эрсдэлийн үнэлгээгээр Дорноговь аймгийн нийт нутгийн 75 хувьд “Нэн эрсдэлтэй” гэсэн дүгнэлт гарсан бөгөөд Улсын нөөцөөс Засгийн газрын 2023 оны 449 дүгээр тогтоолоор 80 тонн хивэг, 479 дүгээр тогтоолоор тэжээл 50 тонн-ыг хөнгөлөлттэй үнээр олгохоор шийдвэрлэсэн.

Монгол Улсын Шадар сайд С.Амарсайхан “Засгийн газрын 233 дугаар тогтоолоор мал, малын гаралтай түүхий эд, бүтээгдэхүүнийг Хөдөө аж ахуйн биржээр дамжуулан худалдаалах ажил өчигдрөөс эхэлсэн. Эхний өдөр 238.7 сая төгрөгийн арилжаа хийгдсэн. Ингэснээр дундын зуучлалгүйгээр малчдаас хэрэглэгчдэд шууд хүргэх боломж бүрдэж байгаа. Хөдөө аж ахуйн бирж нь мал, махны арилжааны системийн хөгжүүлэлтийг хийж худалдагч, худалдан авагч нь хаанаас ч захиалга өгдөг нээлттэй, хялбар системийг бий болгосон. Энэ нь захиалга дээр тулгуурласан арилжаа, дуудлага худалдааг байнга зохион байгуулах боломжийг бүрдүүлэх юм. Мөн малчид их хэмжээний мал махаа зээлээр худалдан борлуулах боломжтой” хэмээн онцоллоо.

Дорноговь аймагт олон улсын ачаа тээврийн гол боомт Замын-Үүд болон төв магистраль зам байрладаг учраас зам даваа хаагдах үед авто зам гаргахад шаардлагатай авто грейдерийг Улсын нөөцөөс шийдвэрлэлээ.

УЛСЫН ОНЦГОЙ КОМИСС, ОНЦГОЙ БАЙДЛЫН ЕРӨНХИЙ ГАЗРААС ДОРНОГОВЬ АЙМАГТ АВТО ГРЕЙДЕР, ДИЗЕЛЬ ТҮЛШИЙГ ШИЙДВЭРЛЭЛЭЭ

Монгол Улсын Шадар сайд, УОК-ын дарга С.Амарсайхан, УИХ-ын гишүүн Б.Дэлгэрсайхан, Т.Энхтүвшин нар /2024.01.18/ Дорноговь аймгийн Даланжаргалан, Иххэт сумдад ажилласан. Өвөлжилт хүндэрсэн сумдын даваа, зам харгуйг нээх үүднээс Улсын онцгой комисс, Онцгой байдлын ерөнхий газраас Дорноговь аймагт цас цэвэрлэх Авто грейдер, Айраг, Алтанширээ, Даланжаргалан, Дэлгэрэх, Иххэт сумдад тус бүр 10 тонн түлш, өвс тэжээлийг 50%-ийн хөнгөлөлттэй үнээр олгох, Иххэт суманд түргэн тусламжийн Ланд круйзер авто машин зэргийг шийдвэрлэсэн.

Дорноговь аймгийн нийт нутгийн 75 хувь нь зудын өндөр эрсдэлтэй, өвөлжилт хүндэрсэнтэй холбогдуулан сумдын малчид руу зам даваа гаргах, өвс тэжээл дөхүүлэх үүднээс Улсын онцгой комисоос цас цэвэрлэх АВТО ГРЕЙДЕРИЙГ орон нутагт хүргэж байна