Монгол Улсын нэгдсэн төсвийн 2025 оны төсвийн хүрээний мэдэгдэл, 2026-2027 оны төсвийн төсөөллийн тухай хуульд өөрчлөлт оруулах тухай хуулийн төслийн  анхны хэлэлцүүлгийг хэлэлцлээ.

Хэлэлцэж буй асуудалтай холбогдуулан гишүүд асуулт асуулаа.

УИХ-ын гишүүн О.Батнайрамдал:

Боловсролын сайдад хандсан хоёр асуулт байна. Засгийн газрын нийт 22 тусгай санд 11.6 ихнаяд төгрөг байна. Үүнээс Нийгмийн даатгал, Нийгмийн халамжийн сан, Эрүүл мэндийн даатгалын санг авчих хэрэгтэй. Эдгээр нь нийт дүнгийн 92 хувь болно. Үлдсэн 19 сан дээр 947 тэрбум төгрөг ноогдсон байгаа юм. Сайшаалтай нэг зүйл нь өсөлттэй 3 сан байна. Үүнд Мэргэжлийн болон техникийн боловсролыг дэмжих сан, Хөдөлмөр эрхлэлтийг дэмжих сан, Боловсролын зээлийн сан. Нэг ёсондоо хөдөлмөр эрхлэлтийг дэмжих, ур чадвар олгох шаардлагатай санхүүжилтийг хийх сангууд байна.

Боловсролын зээлийн сангийн төсөв 51 тэрбумаар нэмэгдэж орж ирсэн. Үүнийг аав ээж нар, сурагчид сонсож байгаа байх. БЗС-ийн төсөв нэмэгдэж орж ирж байна. Засгийн газрын, Ерөнхийлөгчийн, Засгийн газрын гэрээгээр гадаадад суралцах, Гадаадад суралцах тэтгэлэг зэрэг энэ 4 категорт нийт 103 тэрбум төгрөг оногдсон байна. Тэгвэл дээрх хүмүүс үүний сонгон шалгаруулалт зөв хийгдэж, 103 тэрбум төгрөг зөв хуваарилагдах уу, эзэндээ яг шударга очиж чадах уу гэдэг асуултын тэмдэг. Тэгэхээр үүн дээр хариулт?

Бидний өнөөдөр бухимдаж байгаа зүйл нь; угтаа төсөв бол ард иргэдийн татварын мөнгө, буцаагаад ард түмэнд үйлчилгээ үзүүлж байгаа хэрэг. Энэ нь төсвийн тухай хуулийн 28-р зүйлд зааснаар олон нийтийн хэлэлцүүлэг салбар бүрээр сайтар хийгдэх байсан.

Төсвийн баримт бичгийн 81 дэх хуудсаас харвал яамдаас 300, 40, 20 санал ирсэн гэх. Нэг ёсондоо “гурилдсан” харагдаад байна. Үеийн үед л ингэж явж ирсэн. Харин боловсролын салбар дээр цахимаар хэлэлцүүлэг явуулахад 70802 хүнээс санал ирсэн гэнэ. Би 70 мянган хүнээс санал ирсэн салбар харж байгаагүй. Энэ сайшаалтай ч энэ хүмүүсийн санал хэр бодитой туссан бэ.

Өөрөөр хэлбэл, бодитоор 70 мянган хүнээс санал аваад төсөв дээр тэр хүмүүсийн өөрсдийнх нь татварын мөнгөөр тусгахад механизм нь хэр ажиллаж байгаа юм бэ. Үүнийг бид цаашид хэрхэн сайжруулах ёстой вэ. Үнэндээ бухимдал нь олон нийтийн санал бодитоор тусахгүйд л байдаг. Ямар асуудал байгааг тайлбарлаж өгөөч.

Түүний асуултад Боловсролын сайд П.Наранбаяр хариуллаа.