Ж.Ганбаатар: Төсвийн гүйцэтгэл их хэмжээгээр тасарч, бизнес эрхлэгчдэд ирэх татварын дарамт нэмэгдлээ

Төсвийн гүйцэтгэл их хэмжээгээр тасарч, бизнес эрхлэгчдэд ирэх татварын дарамт нэмэгдэж байгаа энэ нөхцөл байдлын талаар гүйцэтгэх засаглалаас бодит мэдээлэл авах, албаныхны тайлбарыг сонсох саналыг УИХ-ын гишүүн Ж.Ганбаатар Эдийн засгийн байнгын хороонд гаргалаа.Төсвийн гүйцэтгэл маш их хэмжээгээр тасарсан. Үүнийг нөхөхийн тулд ААН-үүдийг  их хэмжээгээр дарамталж байгаа. Бид холбогдох байгууллагуудыг нь дуудаж үүнийг сонсох хэрэгтэй. Том, жижиг гэхгүй бүх л ААН-үүдийг дүүргийн төсөв гүйцэтгэлд саад учруулсан бол гэмт хэрэгт тооцно гэнэ.  Хэний буруугаас энэ төсвийн гүйцэтгэл  их хэмжээгээр тасарсан юм.  Энэ хүмүүст хэн хариуцлага тооцох вэ.  Энэ алдааг Их хурал засна гэж зарим гишүүд яриад байна. Бид гүйцэтгэх зааглал биш, Их хурал яаж засах вэ. Төсвөө тодотгох юм уу, эсвэл  Засгийн газар ямар нэгэн байдлаар хариуцлага ярих хэрэгтэй. Миний хувьд улаан, ногоон, цэнхрээр удирдаад байсан 2026 оны төсвийг яриагүй. 2025 оны төсвийг ярьж байгаа. Төсвийг “алдагдалгүй” гэж ярьж баталсан. Гэвч удалгүй  их наядын алдагдалтай тодотгол хийж ,  одоо бүр хоёр их наяд хүрсэн  нөхцөл байдалтай байна. Үүн дээр Эдийн засгийн байнгын хороо анхаарч, тодорхой мэдээллийг өгөх хэрэгтэй. Миний хувьд Жижиг дунд үйлдвэрлэлийг дэмжих дэд хорооны даргаар нэлээн удаан ажилласан. Ийм учраас ААН-үүдийн хүмүүс зовлон, жаргалдаа ил тод бичиж байна. Би тодорхой хариулт өгч чадахгүй байна. Орлого талдаа нүүрсээ зарж чадахгүй болсон. Жилдээ хэд хэдэн удаа төсвөө тодотгох шаардлага гарч байгаа нь тооцоолол бодитоор хийгээгүйн  илрэл.Үг хэлж, байр сууриа илэрхийлэхээр ямар нэгэн хулгайд нэр холбож, хэвлэлээр дайрдаг. Ийм байдал даамжирч байна. Иймд үүсээд буй нөхцөл байдлыг гүйцэтгэх засаглалын нөхдүүдээс сонсохоор хэрэгтэй. Эдийн засгийн байнгын хороо энэ асуудлыг яаралтай анхаарч, гүйцэтгэх засаглалаас бодит тайлбар, мэдээлэл авч сонсох ёстой.