БНХАУ-ын тээврийн дэд сайдтай уулзаж, тээвэр логистикийн асуудлуудыг хамтран шийдвэрлэхээ илэрхийллээ

Монгол Улсын Засгийн газрын гишүүн, Зам, тээврийн сайд Б.Дэлгэрсайхан өнөөдөр (2026.05.07) ХБНГУ-ын Лайвциг хотноо зохион байгуулагдаж буй Олон Улсын Тээврийн Форумын үеэр БНХАУ-ын Тээврийн дэд сайд Ли Янтай уулзлаа.Уулзалтын эхэнд сайд Б.Дэлгэрсайхан хөрш орнууд Европын оронд ажил хэрэгч уулзалт зохион байгуулж байгааг онцолж, БНХАУ-ын Тээврийн дэд сайдтай олон чухал асуудлаар санал солилцох гэж байгаад талархаж буйгаа илэрхийллээ. Уулзалтаар талууд хоёр улсын авто тээвэр, иргэний нисэх, төмөр зам болон логистикийн салбарын хамтын ажиллагааг эрчимжүүлэх, хил дамнасан тээврийн нөхцөлийг сайжруулах чиглэлээр санал солилцлоо. Автотээврийн салбарын хүрээнд 2023 онд шинэчлэн байгуулсан “Олон улсын автотээврийн харилцааны тухай” Засгийн газар хоорондын хэлэлцээрийн хэрэгжилтийг эрчимжүүлэх тухай асуудлыг сайд танилцууллаа. Тодруулбал, хоёр улсын хооронд болон дамжин өнгөрөх олон улсын автотээвэрлэлтийг хэрэгжүүлэх эрх зүйн орчин бүрдсэн хэдий ч монгол жолооч нар БНХАУ-ын нутаг дэвсгэрт жолоочийн даатгалд хамрагдах, зөвшөөрлийн бичгийн хэрэглээ, хилийн бүртгэлийн зохицуулалт тодорхойгүй байгаа нь тээвэрлэлтийн үйл ажиллагаанд хүндрэл учруулж байгааг уламжилж, уг асуудлыг шийдвэрлэхэд дэмжлэг хүслээ. Мөн Монголын тээвэрлэгчид БНХАУ руу аюултай ачаа тээвэрлэх боломж хязгаарлагдмал байгаа асуудлыг хөндөн ярилцлаа.Түүнчлэн хоёр улсын худалдаа, уул уурхайн бүтээгдэхүүний экспорт нэмэгдэж байгаатай холбоотойгоор улс хоорондын ачаа тээвэрлэлтийн “С” төрлийн зөвшөөрлийн бичгийн тоог нэмэгдүүлэх тухай санал солилцлоо.Иргэний нисэхийн салбарын хүрээнд Монгол Улс, БНХАУ хоорондын “Агаарын харилцааны тухай” хэлэлцээрийг шинэчлэх, хоёр улсын хоорондын нислэгийн давтамжийг нэмэгдүүлэх асуудлыг хэлэлцлээ. Талууд цаашид хоёр улсын тээврийн салбарын хамтын ажиллагааг өргөжүүлж, хил дамнасан тээвэр, логистикийн үр ашгийг нэмэгдүүлэх, томоохон дэд бүтцийн төслүүдийг эрчимжүүлэх чиглэлээр нягт хамтран ажиллахаар санал нэгдлээ.