Б.Явуухулангийн нэрэмжит “Отгонтэнгэрийн эгшиглэн” яруу найргийн өдөрлөг зохион байгуулав

Дорнын их яруу найрагч Бэгзийн Явуухулангийн мэндэлсний 97 жил, Монголын Зохиолчдын Эвлэлийн 97 жилийн ой, мөн Дэлхийн яруу найргийн өдөр-ийг тохиолдуулан Улсын Их Хурлын гишүүн Н.Батсүмбэрэлийн санаачилгаар Дорнын их яруу найрагч Бэгзийн Явуухулангийн нэрэмжит “Отгонтэнгэрийн эгшиглэн” яруу найргийн өдөрлөг, арга хэмжээг Б.Явуухулангийн нэрэмжит цэцэрлэгт хүрээлэнд зохион байгууллаа. УИХ-ын гишүүн Н.Батсүмбэрэл:"Энэхүү өдөрлөгөөр Монголын утга зохиол, яруу найргийн үнэт өвийг олон нийтэд сурталчлан таниулахын зэрэгцээ их найрагчийн уран бүтээл, үзэл санаа, эх орон, хүн ардаа гэсэн чин сэтгэлийн дуудлагыг дахин сануулсан утга төгөлдөр арга хэмжээ боллоо. Яруу найраг бол ард түмний сэтгэлийн толь, үндэстний оюуны дархлаа билээ. Тиймээс их найрагч Бэгзийн Явуухулангийн өвийг түгээн дэлгэрүүлэх, залуу үед өвлүүлэн үлдээх үйлсэд хувь нэмрээ оруулах нь бид бүхний эрхэм үүрэг юм" гэв.