Х.Ганхуяг: Онцгой байдлын байгууллагын алба хаагчдад олгодог мөнгөн урамшууллыг нэмэгдүүллээ

Онцгой байдлын салбарт ажиллаж буй албан хаагчид жилд 4400 гаруй онц өндөр эрсдэлтэй гамшгийн дуудлагаар албан үүрэг гүйцэтгэсэн байдаг. Зөвхөн өнгөрсөн жилд л гэхэд нийтдээ 5300 гаруй хүний амь насыг аварч, 230 тэрбум төгрөгийн хохирлыг урьдчилан сэргийлж чадсан байна. Тус салбарынхан цас зуд, шуурга, гал түймэр гээд бүхий л эрсдэлтэй хүнд нөхцөлд тэргүүн эгнээнд явж манлайлж, оролцдог. Энэ асуудал дээр нь Сангийн сайдын хамтаар тушаал гарснаар нэмэгдлийг олгох боломжтой болж, онцгой байдлын байгууллагын алба хаагчдад олгодог мөнгөн урамшууллыг нэмэгдүүллээ.Гамшгаас хамгаалах тухай хуулийн 50 дугаар зүйлийн 50.6 дахь заалтыг үндэслэн Монгол Улсын Шадар сайд, Сангийн сайдын 2026 оны 03 дугаар сарын 17-ны өдрийн 68/А62 дугаар тушаалаар “Амь нас, эрүүл мэнд хохирох өндөр эрсдэлтэй нөхцөлд үүрэг гүйцэтгэсэн онцгой байдлын байгууллагын алба хаагчид мөнгөн урамшуулал олгох журам”-ыг шинэчлэн баталлаа. Тус журамд:Аюулт үзэгдэл, ослын голомтод үүрэг гүйцэтгэж хүний амь нас аварсан тохиолдолд аварсан хүний тоогоор /85 хувь/;Буцалтгүй нэрвэгдэгч гаргасан тохиолдолд /105 хувь/;Гамшгийн голомтод үүрэг гүйцэтгэхээр агаарын хөлгөөс шүхэр болон десантаар буусан зааварлагч, шүхэрчин аврагч нарын буулт тутамд /44 хувь/; Гал түймрийн голомт, усны болон газрын гүнд тусгай зориулалтын хувцас хэрэглэлтэй үүрэг гүйцэтгэсэн тохиолдол /15 хувь/-ийн мөнгөн урамшуулал олгохоор тус тус тусгалаа. Энэхүү журам батлагдсанаар алба хаагчийн ур чадварыг нэмэгдүүлэх, тэдний нийгмийн баталгааг хангахад дэмжлэг болохоос гадна Онцгой байдлын байгууллагын алба хаагчид албандаа тогтвор суурьшилтай ажиллах боломж бүрдэж байгаа юм.