Даланзадгадын 50МВт-ын ДЦС-ыг барих санхүүжилтийг БОНД гаргаж шийдвэрлэнэ

Монгол Улсын Засгийн газрын “Аймгийн үнэт цаас гаргах зөвшөөрөл олгох тухай” тогтоол, Өмнөговь аймгийн ИТХ-ын “Аймгийн үнэт цаас гаргаж арилжих тухай” тогтоолыг үндэслэн Санхүүгийн зохицуулах хорооноос “Өмнөговь бонд”-ыг гаргах зөвшөөрлийг олгосон. Тус бонд нь Өмнөговь аймгийн Даланзадгад суманд 50 МВт-ын хүчин чадал бүхий дулааны цахилгаан станц барих төслийн санхүүжилтийг босгож байгаа бөгөөд Өмнөговь аймгийн өсөн нэмэгдэж буй эрчим хүчний хэрэгцээг хангах стратегийн ач холбогдолтой бүтээн байгуулалт юм.Энэхүү ажлыг эхлүүлэх үеэс эхлэн “орон нутгийг өр төлбөрт оруулна”, “эрсдэлтэй шийдвэр” гэх мэт улс төрийн эсэргүүцэл, эргэлзээ дагуулсан олон саад бэрхшээл тулгарч байсан ч Өмнөговьчууд хөгжлийн төлөө нэгдэж, аймгийнхаа ирээдүйн төлөө томоохон төслийг эхлүүлж чадлаа. Өмнөговь бусад аймгуудаас анх удаа хөрөнгийн зах зээлд БОНД гаргалааДаланзадгадын цохилох зүрх болох Дулаан, цахилгаан хосолсон 50 МВт-ын ДЦС ашиглалтад орсноор өсөн нэмэгдэж буй эрчим хүчний хэрэглээг дотоодоос хангах, найдвартай эх үүсвэртэй болох, үйлдвэрлэл үйлчилгээ, уул уурхай, бизнесийн тогтвортой орчныг бүрдүүлэх, хөгжлийг шинэ шатанд гаргах зэрэг олон талт ач холбогдолтой. Тухайлбал, орон нутгийн хөгжлийг дэмжих, бүтээн байгуулалтын томоохон төслүүдийг санхүүжүүлэх зорилгоор: Нийт 500,000,000,000 төгрөгийн бондыг хэсэгчлэн гаргана. Үүнээс:2026 онд: 150,000,000,000 төгрөг,2027 онд: 300,000,000,000 төгрөг,2028 онд: 50,000,000,000 төгрөгийг тус тус татан төвлөрүүлнэ.2 жилийн хугацаатай, жилийн 16%-ийн хүүтэй, нэг бүр нь 100,000 төгрөгийн нэрлэсэн үнэ бүхий 1,500,000 ширхэг “Өмнөговь бонд”-ыг олон нийтэд нээлттэй арилжиж, нийт 150 тэрбум төгрөгийг татан төвлөрүүлэх арилжаа Монголын Хөрөнгийн Бирж дээр ийнхүү эхэллээ. Энэхүү бонд нь иргэдэд хөрөнгөө өсгөх боломж олгохын зэрэгцээ аймгийн хөгжилд бодит хувь нэмэр оруулах ач холбогдолтой юм.“Өмнөговь бонд” хамтын хүчээр ₮150 тэрбумын санхүүжилт төвлөрүүллээ2026 оны 5 дугаар сарын 13-ны өдөр Монголын Хөрөнгийн Бирж дээр “Өмнөговь бонд”-ын цан цохих ёслол болж, эхний шатны ₮150 тэрбумын санхүүжилтийг хөрөнгө оруулагчдын өндөр эрэлтээр бүрэн татан төвлөрүүллээ. Эхний шатанд стратегийн хөрөнгө оруулагчдаас гадна нийт 206 иргэний захиалга ирснээс 80 гаруй хувийг Өмнөговь аймгийн иргэд бүрдүүлсэн нь орон нутгийн иргэд өөрсдөө аймгийнхаа хөгжилд бодитоор оролцож буйг харуулж байна.УИХ-ын гишүүн Р.Сэддорж “Өмнөговь аймгийн Даланзадгад хотод хамгийн тулгамдсан асуудал ДЦС. Сүүлийн жилүүдэд Даланзадгад хотын хүн ам огцом нэмэгдэж байгаа. Саяхан л гэхэд 50 мянган хүнтэй байсан өнөөдөр 85 мянган хүнтэй болж. Цаашдаа хүн амын өсөлт улам нэмэгдэнэ. Өмнөговь аймагт ажиллаж амьдарч байгаа уул, уурхайн иргэдээ тооцвол аль хэдийнээ 150 мянга гарсан хүн амтай болсон. Иймд хүн амд хамгийн тулгамдсан асуудал нь ДЦС-ын хүчин чадал хүрэхгүй, аваарын байдалтай ажиллаж байгаа. Хамгийн их төсөв бүрдүүлж байгаа хэр нь станц нь аваарын байдалтай ажиллах нь маш харамсалтай! Иймд 2023 онд Өмнөговь аймгийн Иргэдийн хурлаар шийдвэр гарсан. Тодруулбал, тухайн үед Засаг дарга байхдаа миний бие энэ асуудлыг тухайн үеийн Сангийн сайд Б.Жавхлант танилцуулж улмаар Сангийн яам зөвшөөрч ажлыг эхлүүлсэн. Ингээд үе үеийн ЗГ, Монгол Банк, Санхүүгийн зохицуулах хороо гэх мэт байгууллагууд зөвшөөрч өнөөдөр цан цохих хэмжээнд хүрлээ. Нэг ёсондоо, 16%-ийн хүүтэй, 24 сарын хугацаатай 500 тэрбум төгрөгийн бондын арилжааг ийн эхлүүллээ. Түүнчлэн энэхүү Бонд нь нийслэлийн дараа аймгуудаас гарч байгаа “анхны бонд” юм. Банкнууд маш их сонирхож байгаа. Бид татварын тухай хуульд нэмэлт өөрчлөлт оруулж аймгууд бонд гаргавал нийслэлтэй адилхан 5%-ийн хөнгөлөлт эдэлдэг байх зохицуулалт дээр хууль санаачилж оруулахаар бэлтгэж байна. Өмнөговь аймаг маань улсад төвлөрүүлэх орлого сүүлийн жилүүдэд огцом нэмэгдсэн учраас Монгол Улсын засгийн газар бонд гаргах зөвшөөрөл олгож байгаа. Нэг ёсондоо төлөгдөх баталгаа нь хангалттай гэж үзэж байгаа юм” гэв.