Эдийн засгийн тусгай бүсийн тухай хуулийн шинэчилсэн найруулгын төслийг өргөн барилаа

УИХ-ын гишүүн Х.Ганхуяг, Ц.Мөнхбат, Р.Батболд нарын гишүүд дэлхийн эдийн засгийн түгээмэл хандлага, өөрийн орны өвөрмөц онцлогт нийцүүлэн эдийн засгийнхаа эргэлтийг сайжруулан улс орны хөгжлийг хурдасган өсөлтийг нэмэгдүүлэх зорилтын хүрээнд Чөлөөт бүсийн тухай хуулийн шинэчилсэн найруулгын төслийг боловсруулан өргөн барьж байна.Манай улсад чөлөөт бүсийн үзэл баримтлал, хууль эрх зүйн орчин бүрэлдээд арав гаруй жил өнгөрч, энэ хугацаанд улсын төсвөөс нэлээд хөрөнгө оруулсан ч тодорхой үр дүнд хүрч чадахгүй байна.Тухайлбал “Алтанбулаг”, “Замын-Үүд”, “Цагааннуур”-ын чөлөөт бүсүүдийн одоогийн үйл ажиллагаа нь чөлөөт бүсийн хөгжил, түүнийг дагасан хотжилт, бүтээн байгуулалт, үйлдвэржилтийн талаар тодорхой ахиц үгүй, эдийн засагт тус нэмэр болох тухай анхны зорилтууд нь хэрэгжээгүйгээс эдгээр чөлөөт бүсүүд үр ашиггүй гэж нэрлэгдэх болж байна.Иймд чөлөөт бүс нь улсын төсвөөр тэтгүүлдэг биш өөрөө өөрийгөө санхүүжүүлээд зогсохгүй улсын төсөвт хөрөнгө төвлөрүүлдэг газар болгож өөрчлөх зарчмын үндсэн дээр эрх зүйн орчныг улс орны хөгжлийн өнөөгийн шаардлага, хэтийн чиг хандлага, тэргүүлэх туршлагад нийцүүлэн боловсрууллаа.Хуулийн төсөл батлагдсанаар дараах үр дүн, ач холбогдол бий болно.Эрх зүйн орчин тодорхой, нэгдмэл болно. Чөлөөт бүсийн зохицуулалтыг эдийн засгийн тусгай бүсийн өргөн хүрээтэй тогтолцоонд шилжүүлснээр нэр томьёо, төрөл, тусгай дэглэмийг тодорхой болгож, холбогдох хууль тогтоомжийн давхардал, зөрчлийг арилгах нөхцөл бүрдэнэ.Бүс бүрийг онцлог, давуу талд нь тулгуурлан хөгжүүлэх боломж нэмэгдэнэ. Эдийн засгийн тусгай бүсийг чөлөөт худалдаа, экспорт боловсруулах, аж үйлдвэр, шинжлэх ухаан-технологи, нэгдсэн тусгай бүс зэрэг чиглэлээр төрөлжүүлснээр орон нутгийн нөөц, байршил, дэд бүтцэд тохирсон хөгжлийн бодлого хэрэгжүүлэх боломжтой болно.Удирдлага, шийдвэр гаргалт шуурхай болно. Бүс байгуулах, өөрчлөх, татан буулгах болон байршил, хилийн заагтай холбоотой шийдвэрийг эдийн засгийн бодлого, хөрөнгө оруулалтын стратегитай уялдуулан шуурхай гаргах боломж бүрдэж, бүсийн удирдлагын бие даасан байдал, хариуцлага нэмэгдэнэ.Бизнес, хөрөнгө оруулалтын орчин сайжирна. Төрийн үйлчилгээг “нэг цонхны үйлчилгээ”-нд төвлөрүүлж, зөвшөөрлийн үйл ажиллагааг эрсдэлд суурилсан, цахим хэлбэрт шилжүүлснээр шат дамжлага, хугацаа, зардал болон хүнд суртал буурч, хөрөнгө оруулагч, аж ахуйн нэгжид илүү таатай нөхцөл бүрдэнэ.Төрийн үйл ажиллагааны ил тод байдал, уялдаа сайжирна. Хуулийн этгээд, хөрөнгө оруулалт, гааль, татвар, зөвшөөрөл, гэрээ, маргаантай холбоотой мэдээллийн нэгдсэн сан бүрдүүлснээр бодит мэдээлэлд суурилсан төлөвлөлт, хяналт, шийдвэр гаргалтын нөхцөл бүрдэнэ.Хөрөнгө оруулагчийн эрх зүйн баталгаа нэмэгдэнэ. Маргаан хянан шийдвэрлэх тогтолцоог боловсронгуй болгож, арбитр болон бусад үр нөлөөтэй механизмыг хөгжүүлснээр маргааныг шуурхай, хараат бус шийдвэрлэх боломж нэмэгдэж, хөрөнгө оруулагчдын итгэл сайжирна.Эдийн засгийн бодит үр өгөөж нэмэгдэх суурь бүрдэнэ. Үйлдвэрлэл, технологи, инновац, логистик, экспортын чиглэлийн үйл ажиллагааг дэмжсэнээр гадаад, дотоодын хөрөнгө оруулалт татах, нэмүү өртөг шингэсэн үйлдвэрлэл, экспорт, ажлын байрыг нэмэгдүүлэх, эдийн засгийг төрөлжүүлэх боломж өргөжинө.Мөн Чөлөөт бүсийг зөвхөн татвар, гаалийн хөнгөлөлтөд тулгуурласан худалдааны бүс бус, хөрөнгө оруулалт, үйлдвэрлэл, технологи, инновац, экспорт, логистикийг дэмжсэн эдийн засгийн хөгжлийн цогц механизм болгон хөгжүүлэх эрх зүйн үндэс бүрдэх юм.