“150x150” тэтгэлэгт хөтөлбөрт шалгарсан шилдэг оюутнууд батламжаа гардан авлаа 

Улсын Их Хурлын гишүүн Х.Жангабыл санаачлан Баян-Өлгий аймгийн оюутан, залуучуудын дунд 150x150 тэтгэлэгт хөтөлбөрийг зарласан билээ. Энэхүү тэтгэлэгт хөтөлбөрт шалгарсан шилдэг 150 оюутны нэрс тодорч, шалгарсан оюутнуудад батламж гардуулах ёслолын арга хэмжээ Төрийн ордонд боллоо. Монгол Улсын Засгийн газраас 2026 оныг “Боловсролыг дэмжих жил” болгон зарласан. Мөн хүний хөгжил, оюуны хөрөнгө оруулалт бол хамгийн үнэ цэнтэй хөрөнгө оруулалт гэж үзэж байгаа. Энэ үзэл санаан дээр үндэслээд эх орныхоо ирээдүй болсон оюутан, залуучуудыг дэмжих зорилгоор “150x150” тэтгэлэгт хөтөлбөрийг санаачилжээ. УИХ-ын гишүүн Х.Жангабыл:Анх 100 оюутанд тэтгэлэг олгохоор төлөвлөсөн. Гэтэл тэтгэлэг зарласны дараа 1500 орчим оюутан материалаа ирүүлжээ. Энэ нь хэрэгцээ асар өндөр байгааг харуулсан. Тиймээс нэмэлт эх үүсвэр гаргаж, дахин 50 оюутан нэмж, нийт 150 оюутанд тус бүр 1 сая төгрөгийн тэтгэлэг олгохоор болсон гэдгийг 150x150 тэтгэлэгт хөтөлбөрийг санаачлагч Х.Жангабыл гишүүн онцоллоо. Энэ хөтөлбөр зөвхөн аймгийн төвийн хүүхдүүдэд биш, Баян-Өлгий аймгийн бүх сумын оюутнуудад нээлттэй байжээ. Хүн амын тоонд үндэслэн сум бүрт квот хуваарилсан. Шалгарсан оюутнуудын дунд инженер, хиймэл оюун ухаан, технологийн чиглэлийн мэргэжлүүд нэлээд түлхүү байсан байна. Сонгон шалгаруулалтад сурлагын дүн, эсээ бичлэг, хувь хүний зорилго, идэвх зэргийг харсан. Боловсролын салбарын мэргэжлийн хүмүүс оролцож шалгаруулалтыг хийжээ.Тэтгэлэгийн нийт 150 сая төгрөгийн эх үүсвэрийг гишүүний өмнө нь ажиллаж байсан компани нийгмийн хариуцлагын хүрээнд гаргаж байгаа аж. Тэтгэлгийг оюутнуудын сургалтын төлбөрт буюу сургуулийн данс руу нь шууд шилжүүлнэ. Бэлнээр олгохгүй юм байна. Энэ мөнгө нэг их их хэмжээний мөнгө биш ч гэсэн залуусыг урамшуулах, зорилготой болгох, идэвхжүүлэх сэтгэлийн дэмжлэг болно гэж зохион байгуулагчид хэлж байлаа. Х.Жангабыл гишүүн оюуны хөрөнгө оруулалтыг үр дүнтэй хамгийн том хөрөнгө оруулалт гэж үздэг. Монгол Улсын хөгжлийг авч явах залуучуудад загас өгөх биш, загас барих аргын зааж өгч, өвлүүлж үлдээвэл илүү үр дүнтэй байх болно гэдгийг батламж гардуулах ёслолын үеэр залуучуудад хэлж байлаа. Энэхүү тэтгэлэгт хөтөлбөрийг цаашдаа уламжлал болгон өргөн хүрээнд зохион байгуулахаар төлөвлөж байгаа юм байна.“150x150” тэтгэлэгт хөтөлбөрт шалгарсан оюутнуудад батламж гардуулах ёслолын арга хэмжээ Төрийн ордонд боллоо. /2026.05.21/