Б.Найдалаа: Багш, эмчийн цалинтай холбоотой асуудал бол . үе,үеийн Засгийн газрын бодлого нэртэй хүслийнхээ жагсаалт гаргаж баталж ирсний гор юм

УИХ-ын чуулганы /2025.10.31/-ний өдрийн хуралдаан УИХ-ын асуулгын цагаар үргэлжилж байна. УИХ дахь АН-ын бүлгийн гишүүд Засгийн газрын гишүүдтэй мэтгэлцэж байна.УИХ-ын гишүүн Б.Найдалаа:Би танаас багш нарын цалинтай холбоотой асуулт асуух гэж байна. Гэхдээ яг одоо хэдээр нэмэх юм, ямар боломжтой талаар биш.  Ер нь ийм асуудлыг яаж шийдэж байх вэ гэдэг дээр зарчмын байр суурь, бодлогын шийдлийг яаж хийх талаар асууна.  Манай үе,үеийн засгийн газрууд нам харгалзахгүйгээр дандаа алдаа хийж ирсэн нь бодлого гээд бүх хүслийнхээ жагсаалтыг баталчхаад, асуудлаа эрэмбэлэхгүйгээр төсвөө тухайн үеийнхээ байдлаас хараад зоочихдог. Эцсийн дүндээ яг эрэмбийн дээгүүр орох ажлууд хоцорчихсон байдаг. Энэ бол яг багш, эмчийн цалинтай холбоотой асуудал. Үүний цаана жагсахгүй байгаа ч гэсэн бас дараагийн ээлжид цалин нэмүүлэхийг хүлээж байгаа  олонлогууд байгаа юм. Яг жагссан, тухайн үедээ чанга дуугарсан нь нэмүүлдэг. Энэ бол бодлого биш, тухайн үеийнхээ асуудалд чирэгдэж байгаа гал унтрааж буй явдал болчхоод байгаа. Тиймээс цаашдаа үүнийг жагссан үед нь, дуулиан болгож биш, нэлээн урт хугацаагаар, ирэх 3-5 жилийн хугацаанд асуудлаа эрэмбэлээд,  үнэхээр чухал гэж үзэж байгаа бол багш, эмч, төрийн албан хаагчийн гэх мэт цалинг нэмэх бодлогыг тууштайгаар баталчхаад, үүнийхээ дагуу гишүүд болон цалин авах гэж байгаа иргэд нь хяналтаа тавиад явдаг энэ бодлогыг та яаж хийх вэ? Үүнийг хийнэ гээд хэлэхэд амархан боловч, яг үнэндээ Монголын улс төрд бид нарын энэ шийдвэр гаргаж байгаа түвшинд  жишиг болоогүй асуудал. Уг нь ЗГ-ын зүгээс дорвитойхон шиг урт, дунд хугацааны тоотой, дүнтэй бодлогын шийдвэр гаргах юм бол Их хурлын зүгээс хянаад явах боломж байна. Үүн дээр та ямар өөрчлөлт хийх гэж байна вэ?