Эрчим хүчний салбарын тогтвортой хөгжлийг хангах шаардлагатай

Одоогоор салбарын ажилчдын цалинг 30 хувиар нэмэх төсвийн боломж байхгүй. Бодит боломждоо тулгуурлаад цалингийн санг 10 хувиар нэмнэ. Гэхдээ нийтээр нь хавтгайруулахгүй. Захирал, удирдлагуудын цалинг энэ удаа нэмэхгүй. Харин яг талбар, үйлдвэрлэлийн инженер, техникийн ажилтан болон цалин багатай залуусынхаа цалинг нэмнэ. Цаашид цалингийн тогтолцоог системээр нь шударга болгох ёстой. Үүнд Үйлдвэрчний эвлэлийн холбоодыг хамтарч ажиллахыг урьж байна. Энэ долоо хоногт Эрчим хүчний зөвлөлийн хуралдаанаар салбарын ажилтан, алба хаагчдын хүний нөөцийн бодлогын баримт бичгийг хэлэлцэнэ. Энэ хүрээнд инженер техникийн ажилтнуудын хөдөлмөрийн бүтээмжийг нэмэгдүүлэх, үнэ цэнийг өсгөх, урт хугацаанд цалин хөлсийг үе шатлалтайгаар нэмэгдүүлэхээр зорьж байна. Цалин хөлс бол нэг удаа аргацааж өнгөрдөг төдий асуудал биш. Бид ажил хаяж биш, ажил хийж салбараа аварна. Ажил хаяхгүй байхыг салбарын ажилтнууддаа уриалж байна.Бидэнд хийх ажил их бий, асуудлыг ажил хаялт, зөрчил маргаанаар биш харилцан ойлголцол, бодит шинэчлэлээр даван туулцгаая!