Бизнес эрхлэгчдийн зүгээс жигд, шударга тогтолцоо нэн шаардлагатайг хэлж байна!

Сүүлийн хоёр жилийн хугацаанд УИХ-аас татварын орчныг сайжруулах чиглэлд олон ажлууд хийж хэрэгжүүлсэн. Тухайлбал улс орон даяар хэлэлцүүлэг өрнүүлж, 13,000 гаруй компани, иргэдээс 176,000 гаруй санал аваад байна. Нийт санал өгсөн иргэдийн 52% нь татварын хувь хэмжээг бууруулж өгөхийг, 10% нь одоогийн татварын хууль тогтоомжийн ойлгомжгүй байдал нь ажил хэрэг явуулахад хүндрэлтэй байна, 20 гаруй хувь нь жигд шударга татвар төлдөг болъё гэсэн санал тавьсныг УИХ-ын гишүүн, Татварын эрх зүйн орчныг боловсронгуй болгох санал, дүгнэлт гаргах, холбогдох хууль тогтоомжийн төсөл боловсруулах үүрэг бүхий ажлын хэсгийн ахлагч Л.Соронзонболд мэдээлсэн юм. Нэг ёсондоо, ЗГ-аас өргөн барьсан Татварын багц хуулийн төсөл дээр татварын хувь хэмжээг бууруулахтай холбоотой санал харьцангуй БАГА БАЙНА гэж олон нийт тус ажлын хэсэгт санал, сэтгэгдлээ ирүүлжээ.Засгийн газраас 2025 оны арванхоёрдугаар сарын 31-ний өдөр Татварын багц хуулийн төсөлд тусгасан аж ахуйн нэгжүүдэд чиглэсэн заалтуудаас онцолбол:Аж ахуйн нэгжийн орлогын татварын шатлал шинэчлэгдэж, 6–10 тэрбум төгрөгийн орлогод 15%, 10 тэрбум төгрөгөөс дээш орлогод 25% татвар ногдуулна.Жижиг, бичил бизнесийн хялбаршуулсан татварын босго 400 сая төгрөг болж, 1% татвар төлөх боломж бүрдэнэ.Жижиг, дунд аж ахуйн нэгжүүдийн татварын 90% буцаалт авах босго 2.5 тэрбум төгрөг болно.Өртэй байгууллагын банкны дансанд ирээдүйд орох орлогын 20%-ийг битүүмжлэхгүй үлдээнэ.Гааль дээр НӨАТ-ыг 2 сар хүртэл хойшлуулж төлөх боломжтой.Тайлан залруулах хугацааг 1 жилээс 2 жил болгон сунгасан.Харин иргэдэд чиглэсэн өөрчлөлтүүд:Сарын 500 мянган төгрөг хүртэлх худалдан авалтад төлсөн НӨАТ-ыг 100%,500 мянга–1 сая төгрөгт 50%, 1 саяас дээш хэсэгт 20% тус тус буцаан олгоно.Хөдөлмөр эрхэлж буй бүх иргэдийн сарын 500 мянган төгрөг хүртэлх орлогыг 100% хөнгөлнө.Орон нутагт анх удаа орон сууц худалдан авсан болон эрчим хүчний хэмнэлттэй орон сууц худалдан авсан иргэдэд 15 сая төгрөг хүртэлх татварын хөнгөлөлт олгоно гэж заасан.УИХ-ын гишүүн, ажлын хэсгийн ахлагч Л.Соронзонболд: “Иргэдийн 50 гаруй хувь нь татварын хувь хэмжээг бууруулах санал тавиад байхад хувь хэмжээ буурах санал орж ирэхгүй байгаа нь учир дутагдалтай байна. Ялангуяа ногдол ашигтай холбоотой татварыг давхардуулж авч байна. Татварыг нэг л удаа авдаг байх чиглэлд ажиллавал яасан юм гэсэн саналууд иргэдээс ирсэн. Түүнчлэн иргэд, ААН-үүдээс нэмэгдсэн өртгийн албан татвартай холбоотойгоор янз бүрийн саналууд ирсэн. Гэхдээ хамгийн гол асуудал нь бүгдээрээ жигд татвараа шударга төлдөг болох нь нэг номерын асуудал гэдгийг бизнес эрхлэгчдээс тавьж байна. ЗГ-ын Татварын багц хуулийн нэмэлт өөрчлөлтийн төслөө буцаан татаж байгаа. Манай ажлын хэсэг иргэд, ААН, бизнес эрхлэгчид, танхим, зөвлөл, татварын чиглэлээр мэргэшсэн экспертүүдийн саналыг авсан. Улмаар саналуудыг нэгтгээд ажлын хэсгийн зүгээс ЗГ-т дүгнэлтээ өгнө” гэв..