Ерөнхийлөгч У.Хүрэлсүхээс Эзэн Богд Чингис хааны эш хөргийг гардан авлаа

Монгол Улсын Ерөнхийлөгч У.Хүрэлсүх өнөөдөр /2026.06.23/ санхүүгийн салбарын төлөөлөлтэй уулзлаа. Уулзалтын үеэр Төрийн тэргүүн санхүүгийн зах зээл дэх мөнгөн хөрөнгийн эргэлтийг дэмжих, хувьцаа, бонд, биржийн арилжаа зэрэг санхүүгийн хэрэгслийг хөгжүүлэх үйлсэд үнэтэй хувь нэмэр оруулж ирсэн үе үеийн ажилтан, албан хаагчдад талархал илэрхийлэв. Мөн олон улсын жишигт нийцсэн санхүүгийн зах зээлийг Монгол Улсын онцлогт тохируулан хөгжүүлж, эдийн засгийн тогтвортой өсөлтийг дэмжих эрхэм зорилгын төлөө тууштай ажиллахыг хүслээ. Тэрбээр 2025 онд эдийн засаг 6.8 хувиар өсөж, нэг хүнд ногдох ДНБ 7000 ам.доллар давж, худалдаа, хөрөнгө оруулалт нэмэгдэн, гадаад валютын нөөц 7.7 тэрбум ам.долларт хүрч, улсын зээлжих зэрэглэл түүхэн дээд түвшинд хүрсэн бөгөөд үүнд санхүүгийн салбарынхны оруулсан хувь нэмэр их гэдгийг тэмдэглэсэн юм. Санхүүгийн зохицуулах хорооны дарга Т.Жамбаажамц уулзалтыг нээж хэлсэн үгэндээ, Дэлхийн банкны 2025 оны санхүүгийн хүртээмжийн судалгаагаар Монгол Улс санхүүгийн үйлчилгээг хүртэж буй иргэдийн эзлэх хувиар дэлхийд 9 дүгээрт эрэмбэлэгдсэнийг онцлов. Түүнчлэн Монгол Улсын Ерөнхийлөгчийн санаачилсан “Хүнсний хувьсгал”, “Тэрбум мод”, “Цагаан алт” зэрэг үндэсний хөдөлгөөн, хөтөлбөрүүдийг хэрэгжүүлэхэд санхүүгийн зах зээлийн оролцоог нэмэгдүүлж, шинэ төрлийн санхүүжилт, хөрөнгө оруулалтыг дэмжих, зохицуулалтын уян хатан орчныг бүрдүүлэх, хөрөнгө оруулагчдын эрх ашгийг хамгаалах чиглэлээр ажиллахаа илэрхийллээ.Санхүүгийн зохицуулах хороо нь 11 салбарын 6000 гаруй оролцогчийн үйл ажиллагааг зохицуулж байгаа бөгөөд салбарын нийт хөрөнгийн хэмжээ дотоодын нийт бүтээгдэхүүний 30.2 хувьтай тэнцэж байна. Мөн нээлттэй хувьцаат компани хэлбэртэй банк болон санхүүгийн байгууллагууд өнгөрсөн онд улсын төсөвт 1.3 их наяд төгрөгийн татвар төвлөрүүлсэн. Өнөөдөр санхүүгийн салбарт 30 орчим мянган хүн ажиллаж, нийт иргэдийн 97 хувьд бүтээгдэхүүн, үйлчилгээгээ хүргэж байна. Сүүлийн таван жилийн хугацаанд хөрөнгийн зах зээлээр дамжуулан 260 гаруй компани 7.7 их наяд төгрөгийн санхүүжилт татан төвлөрүүлсэн нь салбарын өсөлт, хөгжлийн боломжийг илтгэж буйг онцоллоо.Нээлттэй компанийн тоо өсөхийн хэрээр баялаг бүтээгчдийн засаглал, ил тод байдал сайжирч, иргэд, олон нийт хөрөнгө оруулагч, хувьцаа эзэмшигчийн хувиар эдийн засгийн өсөлтийн үр өгөөжийг хүртэх боломж нэмэгдэж байгааг мөн тэмдэглэв.Түүнчлэн олон тулгуурт санхүүгийн зах зээлийг хөгжүүлэх, зах зээлд суурилсан санхүүжилтийн тогтолцоог бэхжүүлэх, бизнес эрхлэгчид болон жижиг, дунд үйлдвэрлэл эрхлэгчдэд зориулсан хөрөнгө оруулалт, санхүүжилтийн шинэ сувгуудыг бий болгоход онцгой анхаарч ажиллаж байгааг танилцууллаа.Энэ хүрээнд иргэд, хөрөнгө оруулагчдын эрх ашгийг хамгаалах зорилготой Санхүүгийн хэрэглэгчийн эрхийг хамгаалах тухай хуулийн төсөл, бичил санхүүгийн үйлчилгээний хүртээмжийг нэмэгдүүлэх Санхүүгийн хоршооны тухай хуулийн төслүүд Улсын Их Хуралд хэлэлцэгдэж байна.Мөн үл хөдлөх хөрөнгийн сангийн үйл ажиллагааны зохицуулалт, факторингийн үйлчилгээ, хамтын санхүүжилтийн тогтолцоо зэрэг шинэ төрлийн санхүүгийн бүтээгдэхүүн, үйлчилгээг хөгжүүлэх эрх зүйн орчныг бүрдүүлэх хуулийн төслүүдийг боловсруулж, олон нийтийн санал авч байгааг мэдээлэв.Уулзалтын төгсгөлд Монгол Улсын Ерөнхийлөгч Эзэн Богд Чингис хааны эш хөргийг хүндэтгэн залах тухай зарлигийнхаа дагуу Санхүүгийн зохицуулах хорооны дарга Т.Жамбаажамцад Эзэн Богд Чингис хааны эш хөргийг үндэсний үнэт өв, төрт ёсны бэлгэдэл болгон гардууллаа.