Санхүүгийн хоршооны тухай хуулийн шинэчилсэн найруулгын төслийг дэмжиж, анхны хэлэлцүүлэгт шилжүүллээ

УИХ-ын чуулганы өнөөдрийн нэгдсэн хуралдаанаар Санхүүгийн хоршооны тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг үзэл баримтлалын хүрээнд хэлэлцүүлэхийг гишүүдийн олонх дэмжиж, анхны хэлэлцүүлэгт бэлтгүүлэхээр Эдийн засгийн байнгын хороонд шилжүүллээ.Санхүүгийн хоршооны тухай хуулийн төслийг УИХ-ын гишүүн Д.Үүрийнтуяа, Б.Заяабал нар өргөн мэдүүлсэн бөгөөд чуулганы нэгдсэн хуралдаанаар хуулийн төслийн талаар УИХ-ын гишүүн Д.Үүрийнтуяа, Эдийн засгийн байнгын хорооны холбогдох санал, дүгнэлтийг УИХ-ын гишүүн Л.Соронзонболд тус тус танилцуулсан юм. Өнөөдрийн байдлаар 172 ХЗХ үйл ажиллагаа явуулж байгаагаас 53.5 хувь буюу 92 ХЗХ орон нутагт, 46.5 хувь буюу 80 ХЗХ нийслэлд байна. Өнгөрсөн оны байдлаар салбарын нийт хөрөнгө 379.0 тэрбум төгрөгт хүрч, нийт гишүүдийн тоо 77,155 хүрсэн нь эдийн засгийн идэвхтэй хүн амын 5.5 хувийг бүрдүүлж байгаа бөгөөд нэг зээлдэгчийн дундаж зээл 10.3 сая төгрөг, нэг хадгаламж эзэмшигчийн дундаж хадгаламж 5.3 сая төгрөг байна. Хадгаламж, зээлийн хоршооны тухай хууль 2011 онд батлагдсан бөгөөд өнгөрсөн хугацаанд хууль хоорондын давхардал, хийдэл, зөрчлийг арилгах зорилгоор 4 удаа нэмэлт, өөрчлөлт оруулснаас өөрөөр шинэчлэл хийгдээгүй. Уг хуулийн шинэчилсэн найруулга болох Санхүүгийн хоршооны тухай хуулийн төслийг баталснаар тогтворжуулалтын сан, хадгаламжийн даатгал зэрэг хамгаалалтын олон давхарга бүхий салбарын нэгдсэн дэд бүтцийг олон улсын сайн жишгийн дагуу үе шаттай нэвтрүүлэх боломж бодитоор бүрдэнэ. Мөн санхүүгийн олон төрлийн үйл ажиллагаа эрхлэх боломжийг нээж, ашгийн төлөө бус хуулийн этгээд байх нарийвчилсан зохицуулалтууд хийгдсэнээр санхүүгийн хоршооны зах зээлийн тогтвортой байдлыг хангах, зах зээлийн цаашдын өсөлтийн нөхцөлийг бүрдүүлэх, гишүүдийн эрх ашгийг хамгаалах механизм боловсронгуй болно. Мөн санхүүгийн хоршоогоор дамжуулан орон нутагт санхүүгийн хүртээмжийг сайжруулах, иргэдэд санхүүгийн боловсрол олгох, гишүүдэд зөв дадал хэвшил суулгах, жижиг, дунд үйлдвэрлэл болон ногоон санхүүжилтийг дэмжих замаар ажилгүйдэл, ядуурлыг бууруулж, орон нутгийн хөгжлийг дэмжих ач холбогдолтой.Хууль батлагдсанаар санхүүгийн хоршооны үйл ажиллагаанд тавьж буй хяналт шалгалтын үр нөлөө, эрсдэлийн удирдлагын тогтолцоог сайжирч, санхүүгийн салбарт учирж болзошгүй эрсдэлийг урьдчилан тооцоолж, түүнээс сэргийлэх, улмаар санхүүгийн тогтвортой байдлыг хангах, салбарын хөгжлийг дэмжих таатай орчин бий болно.