“Санбэйс 2026” хаврын уралдаан Дорнод аймагт эхэллээ

Дорнод аймагт хурдан морины уралдааны нээлт болж “Санбэйс 2026” хаврын анхны уралдаан /2026.05.02/ эхлээд байна. Уралдаанд 8 насны морьд газар газраас цуглаж, уяа сойлго, шандсыг сорин уралдаж байгаа юм.Хаврын анхны хурдан морины уралдааны нээлтэд аймгийн Засаг дарга Ш.Ёл, УИХ-ын гишүүн М.Бадамсүрэн, У.Отгонбаяр, Монголын Морин Спорт, Уяачдын Холбооны дэд тэргүүн, тод манлай уяач Х.Бат-Эрдэнэ нар оролцлоо. УИХ-ын гишүүн М.Бадамсүрэн “Зүүн бүсээс сонгогдсон гишүүдийн санаачилга, дэмжлэгээр Монгол адууны үүлдэрлэг байдлыг хамгаалах, эрлийз адууны тоог цөөрүүлэх зорилгоор 2026 оноос 2036 он дуустал үржлийн адууг импортоор оруулж ирэхийг хориглох шийдвэрийг УИХ-аар гаргуулсан. Ийнхүү цаашид ч хууль тогтоомж болон хөрөнгө оруулалтын ажлыг эрчимжүүлэхэд чиглэж ажиллана. Тухайлбал Дорнод аймагт морь барианы газрыг олон улсын стандартад нийцүүлж байгуулахаар төлөвлөсөн. Олон уралдаан тэмцээнийг зохион байгуулснаар үүнийг дагасан аялал жуулчлал, эдийн засгийн урсгалыг үүн бүс нутагт нэмэгдүүлэх боломжтой” гэв.Аймаг орон нутгийн зүгээс ирэх жилүүдэд малчдаа дэмжих цогц бодлогыг хэрэгжүүлж ажиллах бөгөөд "Морин спорт, уяачдын холбоо"-той нягт хамтран ажиллаж, уяачдынхаа эрдэм ухаан, хөдөлмөр зүтгэлийг үнэлэх, тэднийг сурталчлах, залгамж халааг бэлтгэх чиглэлээр хамтарсан хөтөлбөрүүдийг хэрэгжүүлэхээс гадна энэ жилийн намар морь сонирхогчдын дунд "Адууны үзэсгэлэнг" зохион байгуулж, өв соёлыг сурталчлан таниулах, түгээн дэлгэрүүлэх, залуу малчид уяачид бие биеэсээ суралцах боломжийг бий болгохоор төлөвлөснөө аймгийн Засаг дарга Ш.Ёл хэлсэн үгэндээ онцоллоо.