Монголын хүнс, хөдөө аж ахуй, байгаль орчны ажилтны Үйлдвэрчний эвлэлийн холбооны дарга О.Гантуяатай ярилцлаа.

-Хүнс, хөдөө ахуйн чиглэлээр ажиллаж буй хүмүүсийн хөдөлмөр аюулгүй байдлыг хэрхэн хангадаг вэ?

Саяхан манай холбооноос АПУ компанитай хамтраад хөдөлмөр аюулгүй байдал, эрүүл ахуйн аяны хүрээнд танилцах аялал хийсэн. Хүнсний үйлдвэрүүд дотор тэднийх хамгийн олон стандарт 5 S-ийн зарчим нэвтрүүлсэн. Туршлага судалсан. Иймэрхүү аялал цаашдаа ч үргэлжилнэ. Энэ жилийн хүрээнд ногоон ажлын байр, эрүүл аюулгүй ажиллагаа уриан дор хөдөлмөр аюулгүй байдал, эрүүл ахуйг хангуулах чиглэлээр ажиллана.

Мөн 2013 онд манай салбарт үйлдвэрлэлийн осол гарахгүй, мэргэжлээс шалтгаалах өвчлөл буурсан байх ёстой гэсэн зорилт тавьсан.

-Хүнс хөдөө аж ахуй, байгаль орчны хувьд салбарын онцлогоос шалтгаалж хөдөлмөр аюулгүй ажиллагаа нь өөр байх. Энэ талаар товч дурдаач?

Хүнсний үйлдвэрүүдэд ажиллаж байгаа хүний хувьд уур устай орчинд ажиллах, малчид малын өвчин, малдаа явж байгаад мориноосоо унасан зэрэг тохиолдол нь үйлдвэрлэлийн осол гэж тооцох шаардлагад хүргэж байгаа юм. Ийм байдлаас сэргийлэхийн тулд малчдыг даатгалд хамруулах нь номер нэг ажил. Гэхдээ малчид даатгалд сайн хамрагдаж чадахгүй байгаа.

Ер нь хөдөө аж ахуйн чиглэлд ажиллахад илүү эрсдэлтэй байдаг. Байгаль хамгаалагч, эрсдэлтэй нөхцөлд ажилладаг. Ганц хүн асар том нутгийг хамгаалж байгаа болохоор амь нас нь их эрсдэлтэй.

-Байгаль хамгаалагчдийн хөдөлмөр аюулгүй байдлыг хангахын тулд ямар нөхцлийг хангах ёстой вэ?

Мотоцикль, хийн буу, борооны цув, дуран, малгай, гутал зэргээр наад зах нь хангагдсан байх ёстой. Нэг байгаль хамгаалагчид 1000 км ногддог болохоор иргэдийн оролцоог нэмэгдүүлж орон нутгийнхныг дэмжиж, нөхөрлөлийг дэмжих талаар анхаарч байгаа. Энэ хүмүүст яамнаас дэмжих үзүүлэх чиглэлээр ажиллаж байна. Цаг уурчид өглөө үдэш хүйтэн гэхгүй ажиглалтаа хийгээд явдаг ч илүү хөлс олгодоггүй байсан. Харин энэ жилээс нэмэгдүүлэхээр хэлэлцээрт тусгагдсан.

-Ажилтан хүн өөрөө эрсдлээ тооцдог байх тогтолцоог бүрдүүлж байгаа. Энэ тал дээр танайхаас хэрхэн ажиллаж байгаа вэ?

Салбар үйлдвэрчний хороогоор дамжуулан ажлын байрны эрсдлээ өөрсдөө тодорхойл гэсэн үүргийг өгчихсөн байгаа.

-Хөдөлмөр аюулгүй байдлын тухай хууль өөрчлөгдөх гэж байгаа. Танайхаас ямар санал өөрчлөлтийг хүсч байна вэ?

Бид саналаа өгсөн. Хөдөлмөр аюулгүй ажиллагааны зардлыг байгууллага нэг хувиар төсөвтөө суулгана гэсэн байдгийг болиулж, таван хувь гэж оруулах саналтай байгаа.

Хоёрдугаарт хуулиар тогтоосон комисыг /Үйлдвэрлэлийн ослыг судлан бүртгэх комисс, Аюулгүй ажиллагааны комисс/-ыг сайн ажиллуулж, хянах чиглэлд оролцоё гэсэн санал тавьсан. 2008 оны хуулиар комисс байгуулах ёстой байтал комисс зарим газар үйл ажиллагаа явуулж, сайн ажиллахгүй байгаа нь шүүмлэлтэй байсан. Тиймээс комиссыг идэвхжүүлье.

О.Гантуяа: 2013 онд үйлдвэрлэлийн ослыг “тэглэнэ”