Andrew Marr
Өнөөдөр ганцхан цагийн өмнө гадаад оронд болсон үйл явдлыг өнөө оройн ТВ-ийн нэвтрүүлэг хүлээхгүйгээр, маргааш өглөөний сонин захиалж мөнгө төлөхгүйгээр гар утсан дээрээсээ л уншдаг болчихсон.
Саяхан Герман улс шинэ ерөнхийлөгчтэй болсон мэдээ дэлхий нийтээр цацагдсан даруйд түүний тухай мэдээлэл уншихаар интернэтэд нэрийг нь оруулахад тус улсын албаны сайтуудад аль хэдийн түүнийг Герман улсын ерөнхийлөгч хэмээн биччихсэн байсан. Ерөнхийлөгчийн сонгуульд ялсан даруйд л, хэдхэн минутын дотор амжуулчихсан байсан нь гайхалтай, бас бидний амьдарч буй цаг үеэр бахархмаар.
Монголд ч дэлхийн хэвлэл, мэдээллийн хэрэгслийн хурд, хөгжил хүчтэй нөлөөлж, нэвтэрч, өрсөлдөөн хурцдахын хэрээр удахгүй хуучин хэлбэрүүд ч “ялагдал”-д өөрийн эрхгүй хойш түрэгдэн хоцрох болно...
... Хэвлэл, мэдээллийн хэрэгслийн хувьсгалын догшин салхи үлээж байна.
Хүмүүс мэдээ унших илүү дэвшингүй арга замыг эрж хайн, хэрэглэхийн хэрээр тэдгээрийг дамжуулагчдын хувьд ч шаардлага өссөөр байх хандлагатай болжээ. Ийнхүү хэвлэл, мэдээллийн хэрэгслийн шинэ эрин үе илүү сайн төрлийн, илүү нарийн хэлбэрийн сэтгүүлзүйг бий болгох бололтой.
Интернэтээр ТВ-ийн сувгуудыг түүгээд үзчихэж болох болсон тул уламжлалт урт үргэлжилсэн телевизийн нэвтрүүлгүүдийг үздэггүй үзэгчид ч бий болоод байгаа.
Тэгвэл ном хэвлэгчид тус “үдэшлэгт” юутай ирж байгаа бол?
Би дөнгөж сая Вашингтон хотоос ирлээ. Тэнд би тус хотын “Үндэсний Хэвлэлийн Клуб”-ын дээд түвшний сэтгүүлч, түүхчдээс ярилцлага авсан юм. Гэвч хонгилын давхарт байрлах кофе уудаг буланд хүн бүр л iPad эсвэл гар утсан дээрээ ямар нэг зүйл уншиж байгаа нь харагдлаа. Цахилгаан шатанд ороод дээш өгсөн нэгдүгээр давхарт гарч ирэхдээ би яг л “Хэвлэлийн Эрин Зуун”-аас “Дэлгэцийн Ертөнц”-д хүрээд ирчихсэн мэт санагдаж билээ.
