Хөдөлмөрийн сайд Я.Санжмятав сонгогдсон тойрогтоо ажиллаж байна.

Тэрбээр өнгөрөгч амралтын өдрүүдэд Завхан аймгийн Их уул, Тосонцэнгэл сумдад ажиллаж, ард иргэдтэй уулзан, төр засгаас явуулж байгаа бодлого шийдвэр болон Хөдөлмөрийн яамны үйл ажиллагааны талаар танилцуулан, санал бодлыг нь сонссон байна.

Түүнийг аймагтаа ажиллах үеэр Засаг дарга байхдаа эхлүүлсэн хүүхэд багачуудыг шатрын спортоор хичээллүүлэх бодлого өнөөдөр ид ажил хэрэг болж, энэ спортоор хичээллэх хүүхдийн тоо улам бүр нэмэгдсэн тухай нутгийн иргэд ам сайтай байгаагаа дуулгаж байсан юм.

700 гаруй хүүхэд өнөөдрийн байдлаар шатрын спортоор хичээллэж, 9999 шатарчинд оролцох бэлтгэлээ базааж байна.

Дэлхий нийтээр шатрыг оюуны их спорт хэмээдэг. Бид ч сүүлийн жилүүдэд хүүхдэд суурь боловсрол, төлөвшил олгох, нөгөөтэйгүүр өв соёлоо хөгжүүлэн уламжлуулах зорилгоор энэхүү спортод ихээр анхаарах болсон.

Үүний нэг жишээ нь Завхан аймаг юм. Тус аймагт хэрэгжиж эхэлсэн гурван тулгуурт бодлогын хүрээнд энэ жил 9999 шатарч хүүхэд нэгэн зэрэг оюунаа уралдуулахаар бэлтгэгдэж байна. Үүний бэлтгэл болгож бүх сумын сургуулиуд сорилго тэмцээн зохион байгуулжээ.

Долоон мянга гаруй хүн амтай Завхан аймгийн Их-Уул суманд сургуулийн насны 1000 орчим хүүхэд бий. Эдгээрээс 700 гаруй хүүхэд өнөөдрийн байдлаар шатрын спортоор хичээллэж, 9999 шатарчинд оролцох бэлтгэлээ базааж байна.

Хөдөлмөрийн сайд Их-Уул, Тосонцэнгэл сумдад ажиллалаа