Манай хотын иргэд ихэнхи нь суугаа ажилтай бөгөөд завгүй ажлын хажуугаар өөрийн эрүүл мэнддээ анхаарах нь тун ховор. Тиймээс улс орнууд ард иргэдийнхээ эрүүл мэндийг нийтийн биеийн тамирыг хөгжүүлэх байдлаар хамгаалдаг бөгөөд манайд энэ байдал хэр байгаа талаар Монгол Улсын гавьяат тамирчин, Олимпийн хүрэл медальт, Монголын Олимпийн боксын холбооны Ерөнхий нарийн бичгийн дарга, СБД-ийн ИТХ-ын төлөөлөгч Н.Баярсайхантай ярилцлаа.

-Нийтийн биеийн тамирыг хөгжүүлэх чиглэлд манай улс хэрхэн анхаарч байна вэ. Цаашид ямар ажил хийх шаардлагатай байна вэ.

Биеийн тамир гэхээр манайхан их спорттой андууран, хүндрүүлж ойлгодог. Гэтэл нийтийн биеийн тамир, спорт бол ерөөсөө л идэвхтэй хөдөлгөөн байдаг. Тамирчид тусгайлан бэлтгэл хийгээд, амжилт гаргаад тухайн улсаа сурталчилах нь их спорт. Харин нийтийн биеийн тамираар хүн ардаа эрүүл байлгаж, урт насалж, янз бүрийн өвчин зовлонгоос хол байлгадаг онцлогтой. Нийтийн биеийн тамир хөгжсөн оронд эмнэлэг, эмийн сангууд их цөөхөн байдаг. Бараг хайгаад олдоггүй гэж хэлж болно.

Гэтэл манайд тав алхаад л эмийн сан байдаг нь хүн амын өвчлөл ямар их байгааг харуулдаг. Герман, Өмнөд Солонгост аптек их цөөхөн харагддаг.

-Тэгэхээр юу хийх ёстой вэ?

Төр засаг таны бие бялдарыг анхаарна гэхээс илүү иргэн хүн өөрөө хичээж, эрүүл хооллолт, эрүүл амьдралын хэвшил, зуршлыг өөртөө бий болгосноор урт насалж, удаан жаргана.

Харин үүнд түлхэц үзүүлэхийн тулд төр засгаас, бодлого тодорхойлогч Соёл спорт, аялал жуулчлалын яам, Эрүүл мэндийн яам, Олимпийн хорооноос нийтийн биеийн тамирын арга хэмжээг тогтмол зохион байгуулж, байгууллага аж ахуйн нэгжийг татаж оролцуулан, иргэд рүү хандсан эрүүл мэндийн зөв мэдээллийг хэвлэл мэдээллийн хэрэгслээр дамжуулан өгч байх нь чухал.

Хүн хэлэхээс нааш, цааш чичихээс нааш гэдэг үг бий. Зөв мэдээлэл, сурталчилгаагаар хангах нь их чухал шүү. Тамирчдаар лекц уншуулж, сургуулиудаар явж мэдээлэл өгөх хэрэгтэй. Таргалж байгаа хүмүүсийг эмчийн үзлэгт байнга оруулж байх ёстой.

Хэрвээ та ингэж таргалсаар байвал эрүүл мэндийн хувьд ямар байдалд орохыг нь мэргэжлийн хүнээр хэлүүлж анхааруулах ёстой гэсэн үг. Тэгэхгүй бол ойр дотныхон нь идэш уушны тарга гээд өхөөрдөөд бөөн өвчний үүр уурхай болгочихдог. Ингээд л эдийн засгийн хувьд өчнөөн зардал гаргаж, энд тэндээс хандив тусламж гуйдаг жишээ олон бий.

-Нэг талаар хүн амын өвчлөл их байгаа нь амьдралын буруу зуршил, амьдралын орчин чанар, нийгмийн хөгжилтэй холбоо гэдгийг мэргэжилтнүүд хэлдэг. Нийтийн биеийн тамираа хөгжүүлсэн ямар улсууд байдаг вэ?

Том гүрнүүд байна. Гудамжиндаа чөлөөтэй гүйж, харайж, явган алхаж байна. Манайх ч гэсэн орчин нөхцөл сайжирч, талбай, цэцэрлэгт хүрээлэнтэй болж байгаа учраас хүмүүс өөрсдөө түгжирч бухимдахын оронд алхаж гүйж болно шүү дээ. Би гэхэд өдөрт таван километр газар алхдаг.

Ер нь хүмүүст зөв ойлгуулвал төртэй төргүй хүмүүс хэрэгжүүлээд явах боломжтой асуудал. Түүнчлэн манай эцэг эхчүүд хүүхдээ багаас нь эрүүл чийрэг өсгөхийн тулд гэрийн аргаар арга хэмжээг авч болно. Хамгийн наад зах нь гэхэд багаас нь хөл нүцгэн гүйлгэж, хүйтэн алчуураар биеийг нь арчиж чийрэгжүүлэх боломжтой.

Өнөөдөр хүүхдээ жоохон ханиад хүрэнгүүт л аптекаас эм аваад өгчихдөг нь буруу. Өмнө нь анхаарч чийрэгжүүлж, өөрөөр нь эдгээж сурах хэрэгтэй. Монголчууд өнөөдөр эм тарианд асар их мөнгийг үрж байна.

Өвчтэй хүмүүс улс орныг хөгжүүлэхгүй шүү дээ. Хүн амынхаа эрүүл мэндэд хамгийн энгийн аргаар анхаарч болмоор. Иргэд өөрсдөө ч эрүүл мэнддээ анхаарах хэрэгтэй. Ер нь бол нийтийн биеийн тамирын чиглэлээр төсөв мөнгө бага хуваарилагддаг. Үүнийг шүүмжилмээр байна.

-Ярилцсанд баярлалаа.

Н.Баярсайхан: Таргалж байгаа хүмүүсийг эмчийн үзлэгт байнга оруулж байх ёстой