Учрал.Н 2018.09.17 | UNEN.mn

Гадаадад амьдарч буй эхчүүдэд “Алдарт эх”-ийн одон олгохыг хүсэв

Гадаадад амьдарч буй эхчүүдэд “Алдарт эх”-ийн одон олгохыг хүсэв

Хилийн чанад дахь Монголчуудын холбоо, ТББ-уудын III чуулга уулзалт өчигдөр боллоо. Уулзалтаар хилийн чанадад амьдарч, ажиллаж, сурч буй Монгол иргэдийн хууль ёсны эрх ашгийг хамгаалах, иргэдийн нийгмийн асуудлыг шийдвэрлэх, Монгол сургууль, монголчуудын холбоодын үйл ажиллагааг дэмжих болон гадаадад оршин сууж буй иргэдийн хилийн чанадаас эх орныхоо хөгжил дэвшилд оруулах хувь нэмэр, боломжийн талаар хэлэлцэв.

БНСУ-д 33 мянга, АНУ-д 25 мянга орчим монголчууд ажиллаж, амьдарч байна гэсэн судалгаа бий. Хилийн чанадад 130 мянга орчим монгол ажиллаж амьдарч буй гэсэн тооноос үзэхэд нийт иргэдийн дөрөв орчим хувь хамаарч буй юм. Тиймээс тэдэнд чиглэсэн бодлого, анхаарал хандуулах шаардлагатайг УИХ- ын гишүүн Н.Учрал онцлов.

Мөн тэрбээр “Гадаадад удаан хугацаагаар амьдрахад монгол иргэдэд олон саад бэрхшээл тулгардаг. Тэднийг хүндрэл бэрхшээлээс хэрхэн хамгаалах, иргэдийн хууль ёсны эрх ашгийг хөндөх цаг нэгэнт болжээ. Тэдэнд тулгардаг нийтлэг бэрхшээл эрүүл мэнд, нийгмийн даатгал, хууль, эрх зүйн туслалцаа, давхар иргэншлийн асуудал. Гадаадад амьдарч буй иргэдийнхээ эрүүл мэнд, цаашлаад төрийн үйлчилгээ халамжийг хүргэж эрүүл мэнд, нийгмийн даатгалд хамруулах зайлшгүй шаардлагатай” гэв. Чуулга уулзалтын үеэр АНУ-ын Вашингтон хотын Монгол-Америкийн эмэгтэйчүүдийн холбооны тэргүүн Х.Оюунгэрэл гадаадад амьдарч буй эхчүүдэд “Алдарт эх”-ийн одон олгох санал тавилаа. Үүний хүрээнд УИХ- ын гишүүн Б.Ундармаатай уулзаж хуульд өөрчлөлт оруулах талаар ярилцана гэв.

Сэтгүүлч

Vip76.mn О.Батзаяа batzaya@vip76.mn