Аймгийн Засаг дарга нарт үүрэг чиглэл өглөө
2020.11.17
Батлан хамгаалах, Аюулгүй байдал

Аймгийн Засаг дарга нарт үүрэг чиглэл өглөө

УОК-ын дарга Я.Содбаатар, ЗГХЭГ-ын дарга Л.Оюун-Эрдэнэ нар аймгийн Засаг дарга нартай цахимаар шуурхай хурал зохион байгуулж цаг үеийн мэдээлэл сонсон зарим үүрэг даалгавар өглөө.

Баян-Өлгий аймагт гамшгийн үеийн бэлэн байдлыг хангах хүрээнд "COVID-19"-ийн халдварт цар тахлын түргэвчилсэн оношлуур, эм, эмнэлгийн хамгаалах хувцас хэрэглэлийн нөөц бүрдүүлэх шаардлага буйг хэлж, УОК-оос дэмжлэг хүслээ. Өмнөговь, Дорнод, Дорноговь зэрэг хилийн боомтууд бүхий аймаг орон нутгийн удирдлагад халдвар хамгааллын дэглэмийг холбогдох газар онцгой анхаарч сахин  ажиллахыг сануулав.

Гамшгаас хамгаалах Бүх нийтийн бэлэн байдалд хуулийн хүрээнд иргэдийн эрх ашгийг ханган, сахилга бат, хариуцлагыг чанд мөрдөн ажиллахыг аймгийн удирдлагуудад үүрэг болгож дараах чиглэлээр даалгавар өгөв.

  • -       Засгийн газрын Бүх нийтийн бэлэн байдлын зэрэгт шилжсэн хугацааг 14 хоногоор сунгасан 181 дүгээр тогтоолын дагуу УОК-ын даргын нэгдсэн удирдлага дор нэг удирдлагаар ажиллах,
  • -       Мэдээллийг нэг урсгалаар олон нийтэд өгөх, халдварт цар тахалтай холбоотой аливаа сэжигтэй тохиолдлыг ХӨСҮТ-ээс бүрэн шинжилж, ЭМЯ-наас мэдээлсний дараа олон нийтэд нотлон мэдээлэх,
  • -       Отор нүүдлээр явж буй малчдаа байнгын мэдээллээр ханган, аюулгүй байдал, эрүүл мэндэд нь анхаарч, нутаг заан хязгаарлалт тогтоохгүй байх,
  • -       Орон нутгийн сонгуулийн дараах сум, орон нутгийн Засаг дарга нарын томилгоог хуулийн хүрээнд ЗГХЭГ-тай уялдаа холбоотой ажиллаж, түргэн шийдвэрлэж дуусгах,
  • -       Ажилтан, албан хаагчдыг ажлаас халж, чөлөөлөх хөдөлгөөн хийхгүй  байх,
  • -       ЦУОШГ-аас гаргасан цаг агаарын төлөв байдлын мэдээллийг сайтар авч, ард иргэд, малчдад сэрэмжлүүлэг хүргэж, цаг агаарын аюултай үзэгдлээс үүсэх гамшгаас урьдчилан сэргийлэх,
  • -       Бүх нийтийн бэлэн байдлын зэрэгт шилжсэнтэй холбогдуулан үүрэг гүйцэтгэн ажиллаж байгаа алба хаагчдын ажиллах нөхцөл, аюулгүй байдал, хамгаалах, хувцас хэрэглэлийн хангалтыг бүрэн хийх,
  • -       Хот хоорондын зорчих урсгалд хяналт тавьж, хүнсний хангамжийг тасалдуулахгүйгээр хүнс, махны тээвэрлэлтэд дэмжлэг болж ажиллахыг тус тус үүрэг болголоо

ШИНЭ МЭДЭЭ