2020.12.15
Орон нутгийн хөгжил
Малчдад хөнгөлөлттэй үнээр өвс, ногоон тэжээл нийлүүлэх ажил аймгийн хэмжээнд өрнөж байна
Энэ жилийн хувьд Өвөрхангай аймгийн нийт нутгийн 5.0 хувь л хэвийн, 50 хувь нь гандуу, 45 хувь нь гантай зуссан. Ялангуяа говийн сумдад зун болоогүй, хадлан авах битгий хэл хамар хатгах өвсгүй зуссан билээ.
Харин өнөөдөр Өвөрхангай аймгийн Онцгой комисс зохион байгуулан гадны аймагт оторлоогүй үлдсэн малчин өрх тус бүрт 5 боодол өвсийг хямдралтай үнээр буюу нэг боодлыг 10 мянган төгрөгөөр тооцон өгөх ажил өрнөж байна.
Хайрхандулаан, Гучин-Ус, Төгрөг, Тарагт, Бүрд, Есөнзүйл, Уянга сумд аж ахуйн нэгжтэй гэрээ байгуулж хямдралтай өвс, тэжээлийг малчдад нийлүүлэх ажлыг эхлүүлээд байна. Бусад сумд энэ долоо хоногтоо багтааж өвс, ногоон тэжээл нийлүүлэх ажлыг зохион байгуулах ажээ.
Аймгийн хэмжээнд нийт 14431 малчин өрхөд 72155 боодол өвсийг хямдруулан өгөхөд үнийн зөрүү 188 сая төгрөг болж байгаа юм. Уг зөрүү мөнгийг өвс нийлүүлж байгаа аж ахуй нэгжид аймгаас олгож байна.
ШИНЭ МЭДЭЭ
