УИХ дахь АН-ын бүлгээс УИХ өөрөө тарах болон ээлжит бус сонгууль товлон зарлах тухай тогтоолын төсөлд өчигдрөөс гарын үсэг цуглуулж эхэлсэн. 

Өнөө өглөөний байдлаар нийт есөн гишүүн гарын үсэг зураад байсан бол дөнгөж сая УИХ-ын гишүүн Ж.Бат-Эрдэнэ гарын үсгээ зурлаа. Ингэснээр уг төсөлд гарын үсэг зурсаэ гишүүдийн тоо 10 болсон юм.

УИХ-ын гишүүн Ж.Бат-Эрдэнэ сэтгүүлчдийн асуултад хариуллаа.

Мафижсан гээд яриад байна. Үнэхээр мафижсан төр юм бол Хууль зүйн сайд юу хийж байгаа юм бэ? Ерөнхий сайд нь юу хийж байгаа юм?

-Гарын үсэг зурах болсон шалтгаанаа тайлбарлавал?
-Ж.Мөнхбат өөрийнхөө бланк дээр УИХ-ыг тараах тогтоолын төслийг гаргаж байсан. Би тэрэн дээр ч гарын үсэг зурж байсан. Улс төрийн байдал сүүлийн үед гарцгүй байдал руу орчихлоо. Хоёрдугаарт ард иргэд улстөрчдөд, төр засагт итгэх итгэл нь алдарсан байна.

Тэгэхээр үүнээс гарах гарц нь улстөрчид улс орныг авч явдгийн хувьд эргэн ард түмэн дээрээ очоод шүүлтүүрээр шүүгдвэл яасан юм бэ гэж бодож байна. Буцаад очъё. Өнөөдөр нэг хэсэг нь шударгын туйл, нэг хэсэг нь хар мангас, бузар булайгийн туйл болсон ийм зүйл харагдаж байна. Үнэхээр шударга юм уу гэхээр үгүй юм.

Ард түмэнд очих ёстой ЖДҮХС-ийн зээлийг эрх мэдлээрээ долдойлоод хуваагаад, хамаад авсан байх юм. Тэгсэн хэр нь талбай дээр гараад ард түмнийг турхираад МАНАН гэж ярилаа. Өөр ярьвал бузар булай их л юм байна. УИХ-ын даргын асуудал ч яригдаж байна.

Мафижсан гээд яриад байна. Үнэхээр мафижсан төр юм бол Хууль зүйн сайд юу хийж байгаа юм бэ? Ерөнхий сайд нь юу хийж байгаа юм? Яагаад үүнийхээ учрыг олж чадахгүй байгаа юм. Саяхан уул уурхайн асуудлаар тусгай ажиллагаа явууллаа. Татварын асуудал байсан юм бол Сангийн сайд нь юу хийж байсан юм.

Төр ажлаа хийж чадахгүй байна. Сангийнхаа сайдтай учраа ол. Үнэхээр хуулийн асуудал байгаа бол Хууль зүйн сайдтай учраа ол. Бид төр засаг гэж байгаа бол хуулийн дагуу яриад, тухайн сандал дээр суусан бол ажлаа хийсэн шиг хийх хэрэгтэй. Асуудлыг хууль журмын дагуу шийддэг баймаар байна. Хэн чанга дугарсан нь, хэн бузар булай асуудлыг нэг рүүгээ нялж чадсан нь дээшээ явдаг байж болохгүй. 

Нөгөөтэйгүүр өнөөдрийн улс төрийн нөхцөлд би сайн дүн тавимаар байна. Нийгэм цэвэрших алхам болж байна. Ард түмэнд очсон мэдээлэл, шинэчлэлийн алхам дээр ард түмэн дээрээ очоод дүнгээ тавиулчихвал яасан юм бэ?

ЖДҮ-ийн ард ядуурлыг бууруулах хамгийн том зорилго бий. Дандаа том том юм ярьж хуураад байж болохгүй.

-Улс төрийн байдал гацаанд байна гэлээ. Хэлэлцээд нэг талд нь шийдвэр гаргаж болохгүй байгаа юм уу?
-Эрх мэдлийн төлөөх хагарал шүү дээ. Хэрэв үнэхээр Ерөнхий сайд нь ажиллаж чадахгүй болохгүй байгаа бол намынх нь бага хурал дээр шүүе, хэрэв намын дотор болохгүй асуудал байгаа бол дотроо л яръя, улстөр лүү нялах хэрэггүй. Төр цэвэр байхын үндэс нь нам цэвэр байх. Намын дотоод асуудал ч цэвэр байх ёстой. Ингэж байж дамжин орж ирж буй гишүүд цэвэр байна. 

Ард түмэн болиоч гээд байхад хүчээр зүтгээд гүрийж байхаар эргэж очоод дүнгээ тавиулаад ирэх нь дээр болов уу. 

-ЖДҮ-тэй холбогдсон дөрвөн гишүүний бүрэн эрхийн асуудалд та ямар байр суурьтай байна вэ? 
-Би 2016 оны сонгуульд өрсөлдөхдөө ЖДҮ-г ярьж орсон. Бид тойрогтоо эргээд очихдоо нэг байшин будсан, дотуур байр зассан, нэг эмнэлэг зассан гэу ярьж очмооргүй байна. Бид ард түмний амжиргааг дээшлүүлсэн, хэдэн хүнийг ажилтай болгосон, ямар нийгмийн үйлчилгээ, хэдэн хүний ажлын байр бий болгосон гэдэг хэмжигдэхүүнийг ярьдаг больё гэж бодсон. 

ЖДҮ-ийн ард ядуурлыг бууруулах хамгийн том зорилго бий. Дандаа том том юм ярьж хуураад байж болохгүй.