УИХ-ын Нийгмийн бодлого, боловсрол, соёл, шинжлэх ухааны байнгын хорооны дарга Д.Оюунхорол НҮБ-ын Хүүхдийн сангийн суурин төлөөлөгч хатагтай Рана Фловерсийг өнөөдөр хүлээн авч уулзав.

Байнгын хорооны дарга Д.Оюунхорол уулзалтын эхэнд хатагтай Рана Фловерсийг хүүхдийн асуудал хариуцсан төлөөлөгчөөр манай оронд ажиллахаар томилогдон ирсэнд талархалтай байгаагаа илэрхийллээ.

Тэрээр, 2006 онд хүүхдэд ээлтэй хууль эрх зүйн орчинг боловсронгуй болгох чиглэлээр УИХ-ын гишүүдийн анхны лобби бүлгийг ХТҮГ-тай хамтран байгуулсан ч үйл ажиллагаа нь зогсонги байдалд байгааг дурдаад энэ арга хэмжээг цаашид үргэлжлүүлэн идэвхжүүлэх үүднээс хүүхдийн хөгжил хамгааллыг дэмжих, хүүхдийн төлөө санаа тавьдаг 13 гишүүнээс бүрдсэн лобби бүлэг байгуулахаар төлөвлөөд байгаагаа дуулгасан юм. Энэхүү лобби бүлэг нь хүүхдийн эрхийн холбогдолтой олон улсын гэрээ конвенц, түүний нэмэлт протоколууд үндсэн хуульд нийцэж байгаа эсэхэд дүн шинжилгээ хийх, салбар байгууллагуудад үүрэг чиглэл өгөх зорилготой бөгөөд хүүхдэд ээлтэй хууль эрх зүйн орчинг бий болгож түүний хэрэгжилт, хүүхдийн даатгал, халамжийн асуудал, ялангуяа халамж эзэндээ очиж байгаа эсэхэд анхаарч ажиллана гэлээ.
Уг арга хэмжээг зохион байгуулах, эрчимжүүлэхэд НҮБ-ын хүүхдийн сангийн оролцоо чухал гэдгийг Байнгын хорооны дарга онцолж, мөн энэ чиглэлийн бусад орны туршлага судлах шаардлагатай байгааг ч хэлсэн юм.
Хатагтай Рана Фловерс уулзалтад сэтгэл хангалуун байгаагаа илэрхийлээд, НҮБ-ын хүүхдийн сангийн зүгээс монголын хүүхэд, эмэгтэйчүүдийн эрхийг хамгаалах чиглэлээр чармайлт гарган ажиллахаа мэдэгдэж Байнгын хорооны даргын дурдсан асуудлыг шийдвэрлэх ямар арга зам байгаад анхаарал хандуулна гэлээ. Түүнчлэн монгол хүнтэй уулзаж ярилцахад хүүхдийн төлөө санаа тавьдаг нь юуны түрүүнд харагддаг. Тийм ч учраас энэ асуудал нээлттэй бөгөөд бид зайлшгүй хамтран ажиллах нь чухал байна. Энэ асуудалд хариуцлагатай хандаж, хэрхэн хэрэгжүүлснээр бидний ажил дүгнэгдэнэ. Хүүхдийн даатгал, хүүхдийн халамжийн мөнгө очих ёстой эзэддээ хүрч байгаа эсэхэд эцэг, эхийн хариуцлага мөн чухал гэдгийг тэрээр тэмдэглэв.