УИХ-ын чуулганы /2025.04.03/-ны өдрийн хуралдаанаар Хууль тогтоомжийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүдийн хэлэлцэх эсэхийг хэлэлцлээ.

Хэлэлцэж буй асуудалтай холбогдуулан гишүүд үг хэллээ.

УИХ-ын гишүүн Б.Бат-Эрдэнэ:

Байгаль орчны салбарын 33 хуулинд судалгаа хийхэд давхардал 97, зөрчил 179, хийдэл 335 гэсэн үзүүлэлт гарсан. Давхардал нь эрх зүйн тодорхойгүй байдал, хийдэл нь хууль хоорондын зөрчил үүсгэж, хэрэглээнд хүндрэл учруулдаг. Энэ асуудлыг нэмэлт хууль шийдэж чадах уу?

Хууль тогтоомжийг иргэд олон нийтэд нээлттэй танилцуулах боломжтой гэсэн зарчмыг баримталж байх шиг байна. Гэтэл одоо бидний хэлэлцүүлж байгаа Хууль тогтоомжийн тухай хуульд нэмэлт, өөрчлөлт оруулах тухай хууль нь дээрх шаардлагаа хангасан уу? Аж ахуйн нэгжүүдээс санал авсан уу?

Мөн дагалдах хуулиудын үзэл баримтлал ямар түвшинд байна вэ? Хуулинд нийцээгүй нийтээр дагаж мөрдөх журмын асуудлуудыг цэгцлэхээр ажиллаж байх шиг байна. Гэхдээ хариуцлага тооцох албан тушаалтны асуудал багтсан уу? Үүнээс улбаалж ЭЗ болон үл ойлголцлыг асуудал үүсдэг. Нэмэлт өөрчлөлтөөр энэ асуудлыг зохицуулсан уу?

Түүний асуултад УИХ-ын гишүүн Д.Цогтбаатар хариуллаа.