Энэ 2011 онд Монгол улсад эрүүл мэндийн салбар үүсч хөгжсөний 90 жилийн ой тохиож байгаа юм. Салбарынхаа ойг тэмдэглэн өнгөрүүлэх ажлын хэсэг Эрүүл мэндийн дэд сайд Ж.Цолмонгоор ахлуулан ажиллаж байна. Ойд зориулсан олон талт арга хэмжээ өргөн хүрээгээр төлөвлөгдөн хийгдэж эхэллээ. Үүний нэг нь МҮОНТВ-ийн уран бүтээлчдийн бүтээл туурвилаар олны хүртээл болох телевизийн 60 ангит уран сайхны кино юм. 2011 оны 3 дугаар сарын 9 ний өдөр энэхүү киног хийхэд хамтран ажиллах гэрээнд хоёр тал гарын үсэг зурах ёслол ЭМЯ дээр болов. Гэрээнд

УИХ-ын гишүүн, ЗГ-ын гишүүн, Эрүүл мэндийн сайд С,Ламбаа, Эрүүл мэндийн дэд сайд Ж.Цолмон, МҮОНРТВ-ийн дарга М.Наранбаатар, МҮОНТВ-ийн захирал Ц.Оюундарь нар харилцан гарын үсэг зурлаа. С.Ламбаа гэрээнд гарын үсэг зурж байгаа үйл явдалтай холбогдуулан хэвлэл мэдээлэлд өгсөн ярилцлагадаа, энэ кинонд эрүүл мэндийн салбарын түүхэн хөгжил, ололт амжилт, эмч эмнэлгийн байгууллагын амаргүй ажил хөдөлмөрийн жаргал зовлон, алдаа оноо, ард иргэдийн эрүүл мэндийн мэдлэг хандлага гээд олон зүйлийг уран сайхны аргаар гарган тавьснаараа салбарын цаашдын хөгжилд түлхэц болохуйц ач холбогдолтой нэгэн хамтын шинэ бүтээл болж үлдэнэ гэдэгт итгэлтэй байгаагаа онцолсон юм. Эрүүл мэндийн салбарын 90 жилийн ойг ирэх 6 дугаар сарын сүүлээр ёслол төгөлдөр тэмдэглэн өнгөрүүлэх юм.